Os premiados docentes Fina Paulos e Óscar Rey publican o libro “Aplicacións Web” para os futuros técnicos en Sistemas Microinformáticos

Non paran. Os dous premiados mestres do IES Maximino Romero de Lema continúan coa súa labor divulgativa aberta. Fina Paulos ((natural de Santa Marta Babío, Bergondo, e residente en Oleiros), e Óscar Rey Calo (natural de Corme e residente en Fisterra) contan cunha sólida traxectoria en innovación educativa e proxectos pioneiros de dixitalización e Intelixencia Artificial no ámbito escolar, que se ve reflexada nas páxinas desta nova publicación amosando contidos actualizados á nova realidade educativa, como é a normativa ou o emprego da IA.

A obra publicada coa Editorial Garceta está concebida como un libro de referencia educativo práctico, rigoroso e actualizado, orientado ao módulo de 2º curso “Aplicaciones Web” do ciclo formativo de Técnico en Sistemas Microinformáticos e Redes (SMR), sumando unha nova peza á traxectoria dos autores na divulgación e formación tecnolóxica.

Froito do traballo levado a cabo por estes docentes no último ano, publícase este libro que presenta os conceptos dun xeito claro, sinxelo e dende un punto de vista eminentemente práctico. Cunha linguaxe accesible e orientada á práctica na aula, o libro aborda dende os fundamentos dos xestores de contidos e o deseño web ata a seguridade e a administración de servizos en liña.

Unha traxectoria consolidada na divulgación sobre Intelixencia Artificial

Esta nova publicación reforza o compromiso de Paulos e Rey coa actualización dos currículos educativos e a divulgación científica no ámbito da tecnoloxía. Os dous docentes veñen de ter un papel destacado no ámbito da dixitalización grazas ás súas publicacións sobre a Intelixencia Artificial no eido educativo e social:

• Intelixencia Artificial para a sociedade (Medulia Editorial): obra pioneira en galego pensada para achegar a IA á cidadanía e servir de apoio didáctico na educación secundaria.

• Inteligencia Artificial en el aula: Aplicaciones de la IA en la docencia (Editorial Garceta): un libro de referencia educativo a nivel nacional dirixido ao profesorado e familias para a integración ética, inclusiva e práctica das ferramentas de IA nos procesos de ensino-aprendizaxe.

Innovación e proxectos educativos inclusivos

Máis alá da súa faceta editorial, Fina Paulos e Óscar Rey destacan polo seu traballo directo na aula mediante proxectos educativos punteiros relacionados coa tecnoloxía e a inclusión. Entre eles destaca a súa participación activa en iniciativas como Talentos Inclusivos (en colaboración co CITIC da Universidade da Coruña e ASPACE), onde desenvolven xunto ao alumnado solucións tecnolóxicas e de IA aplicadas a mellorar a calidade de vida de persoas con diversidade funcional.