O Concello de Zas continúa coa súa campaña en defensa dunha sanidade pública digna e de calidade, reclamando solucións urxentes ante a grave falta de persoal sanitario no Centro de Saúde do municipio. 

Tras a reunión informativa mantida coa veciñanza hai dous meses, na que se puxo de manifesto o crecente malestar pola situación, o goberno local deu un paso máis coa recollida de sinaturas para esixir a cobertura inmediata da praza de pediatría e a estabilidade das prazas de medicina de familia. 

A iniciativa contou cun amplo respaldo social, acadando un total de 1.135 sinaturas, unha cifra moi significativa tendo en conta que o municipio conta con algo máis de 4.000 habitantes. Estas sinaturas, xunto coa petición formal subscrita pola veciñanza, foron rexistradas oficialmente polo alcalde, Manuel Muíño, no rexistro xeral da Xunta de Galicia no día de onte, xoves 9 de abril. 

Desde o Concello subliñan que, tras a recollida de sinaturas, se deixou un tempo prudencial para que a Consellería de Sanidade adoptase medidas para resolver a situación. Non obstante, a día de hoxe os problemas persisten: a ausencia de pediatra continúa sen solución e as prazas de medicina de familia seguen caracterizándose por unha alta inestabilidade, con cambios constantes de profesionais e mesmo períodos nos que non hai ningún médico dispoñible. 

O alcalde amosouse especialmente crítico coa xestión da Consellería: “Estamos ante unha situación absolutamente intolerable. Non é de recibo que as familias teñan que cambiar de médico cada quince días ou que, directamente, non haxa ningún profesional dispoñible en determinados momentos. Isto non é unha incidencia puntual, é un abandono continuado e evidente por parte da administración autonómica”. 

Concentración

Con motivo da celebración o 13 de abril do Día Mundial da Atención Primaria, a plataforma SOS Sanidade Pública convoca concentracións en diversas localidades galegas para defender a sanidade pública de calidade, e denunciar o mal estado da atención primaria no noso país. Na Costa da Morte está prevista unha concentración diante do centro de saúde de Baio (Zas), o luns 13 de abril ás 13:00 horas. O acto conta co apoio do BNG da Costa da Morte.

Máis novas