Xa está en marcha a nova edición do Ciclo Mestre Mateo na provincia, e grazas a este circuíto, algunhas das producións máis destacadas do audiovisual galego achegaranse ao público de concellos sen salas comerciais.

Os concellos de Arzúa, Boiro, San Sadurniño, Betanzos, Cedeira e Zas acollerán as proxeccións desta nova edición do ciclo. As persoas interesadas poderán ver un total de oito títulos: Sirât, As liñas descontinuas, Antes de nós, San Simón, 360 curvas, O son da nova regueifa, Deuses de pedra e O silencio herdado.

A presidente da Academia Galega do Audiovisual, Lucía Veiga destacou «a importancia de continuar levando o cinema galego a todo o territorio, especialmente a aquelas localidades que non contan cunha programación audiovisual estábel». Ademais, sinalou que «o Ciclo Mestre Mateo segue a consolidarse como unha oportunidade para achegar ao público as producións máis destacadas do audiovisual galego recente e fortalecer o vínculo da cidadanía coas historias feitas desde Galicia».

Moi pronto saberemos as datas e horarios das proxeccións, que se publicarán en ciclomestremateo.gal.