Stoupa acollerá en xaneiro unha exposición escultórica do ceense Manuel Canosa Despois da mostra colectiva “Stoupidos 2016” que tivo lugar en decembro, damos paso a unha exposición monográfica que se compoñerá das tallas de madeira do artesán ceense Manuel Canosa. Poderá visitarse do 10 ao 31 de xaneiro no horario habitual do establecemento (martes-sábado 11h-14h / 17h-21h e os domingos de 11h-14h). A mostra componse de doce pezas nas que predomina a madeira de castiñeiro e de caoba, aínda que tamén teñen cabida outros materiais como o granito ou diferentes tipos de metais. De formación autodidacta, Manuel Canosa amosa unha particular afección pola cultura popular -na que basea gran parte da súa obra- así como pola heráldica. A fotografía de Mar Cerviño, a cerámica de Nacho Porto, a pintura de Yano Yoro ou Xoanxo Cespón, así como a moda exhibiranse nos próximos meses en Stoupa, no noso programa de exposicións de artistas e artesáns da Costa da Morte.