As mulleres copan a palestra do IV Encontro de Filosofía para Veraneantes de Corcubión

<p>Que pasaría se Deus fose unha muller? Hai verdade das redes sociais? Debe o feminismo ter máis en conta o medio ambiente? Estas son só algunhas das preguntas que abrirán as reflexións colectivas da IV edición consecutiva do ciclo Filosofía para Veraneantes, que organiza durante estas semanas a asociación <a href=https://ucdv.wordpress.com/>Universidade Cromática da Costa da Morte</a> na Capela do Pilar de Corcubión.</p>

<p>Unha edición na que, por primeira vez as 9 ponentes serán mulleres, mulleres de diferentes ámbitos pero sempre dende unha perspectiva rural nun mundo interconectado e da comunidade, segundo coordinaron iguel Vázquez Freire e María Bella.</p>

<p>As presentación e moderacións das mesas correrán tamén a cargo de mulleres. A esta iniciativa súmanse representantes de asociación e comunidades da Costa da Morte. Participarán integrantes da Asociación feminista Buserana ou a da Ecosocial Boca de Sapo. O mundo da cultura ou do xornalismo tamén terán unha participación moi activa.</p>

<h3>5 debates</h3>

<p>Serán 5 tardes de reflexión (hoxe mesmo, luns 29, de xullo, ademais do 31 de xullo, e 7, 8 e 9 de agosto), totalmente abertos ao público xeral, de balde, na Capela do Pilar de Corcubión, as 20:30 horas.</p>

<p>O medio ambiente e o feminismo centrarán o relatorio do primeiro día entre Rosa Arcos, traballadora do rural, e Carme Adán, escritora (29 xullo). A teoloxía e o feminismo protagonizarán a charla do mércores 31 de xullo entre Lucía Santiago e Macamen Díaz, que se pregantarán, entre outras cousas, qué pasaría se Deus fose unha muller.</p>

<p>O terceiro día (7 agosto) a “youtuber” Irene Martínez comentará coa estudante de filosofía Celtia Sar se hai ou non verdade nas redes sociais. O 7 de agosto será a ocasión de reflexionar coa profesora de filosofía Luz Suárez e, na última xornada, o venres 9 de agosto, a cineasta Olalla Sendón establecerá un diálogo aberto coa poeta María Lado.</p>

<h3>4 anos de filosofía estival</h3>

<p>Filosofía para veraneantes celébrase en Corcubión desde hai catro anos. Da man do corcubionés Miguel Vázquez Freire, cada verán, a Capela do Pilar convértese no KM cero do pensamento filosófico máis democrático da Costa da Morte, un convite de balde á reflexión colectiva que vai gañando interese cada ano e sumando público en cada edición, onde a máxima é a participación colectiva dos participantes. Os debates, que contan sempre coa presenza de profesionais de elevado prestixio no seu campo, acaban prolongándose durante horas.</p>

<h2>Novas relacionadas</h2>

<ul><li>2018: <a href=https://www.quepasanacosta.gal/articulo/corcubion/corcubion-ou-a-illa-paradisiaca-de-veraneo-onde-gozar-sumerxindose-na-arte-de-pensar/20180807134203088839.html>Corcubión, ou a illa paradisiaca de veraneo onde desconectar sumerxíndose na arte de pensar</a>.</li>

<li><a href=https://www.quepasanacosta.gal/articulo/corcubion/corcubion-enche-a-capela-do-pilar-de-reflexions/20180802075259088799.html>Corcubión enche a Capela do Pilar de reflexións</a>.</li></ul>