O Grupo Municipal Socialista de A Laracha denuncia o estado de abandono e desuso no que se atopa o Centro Sociocultural da Insua en Caión, un espazo público “que podería ser de grande utilidade para a veciñanza e, en especial, para a rapazada da parroquia”, segundo explicou a voceira.

Inés Ramos, detallou que actualmente o local presenta un estado “lamentable” e non se lle está a dar un aproveitamento axeitado, malia estar situado ao carón dun centro educativo con máis de 60 nenos e nenas. “Estamos a falar dun espazo que debería servir para actividades culturais, educativas e de ocio durante todo o ano, pero que, pola inacción do goberno municipal, permanece practicamente sen vida”, apuntou.

Ramos subliñou que “se un local público non está aberto á veciñanza, non é servizo, é abandono”. Asegurou que resulta unha contradición ter un edificio como o Centro Sociocomunitario de A Balea, de recente construción e cun investimento superior ao millón de euros, a escasos metros do Centro da Insua, e que tampouco está a ser aproveitado como debera. “Non abonda con construír infraestruturas ou gastar cartos en obras se logo non se lles dá vida. O que precisa a veciñanza son espazos vivos, útiles e cunha programación estable”, afirmou.

A voceira lembrou que moitos nenos e nenas acoden ao centro sociocultural da Insua para realizar actividades como clases de pintura, mais as instalacións presentan “condicións deplorables”, o que impide un uso adecuado por parte das familias.

Criticou tamén que o centro sociocomunitario de A Balea permaneza pechado polas mañás, "mesmo cando dispón de aulas de estudo que poderían ser empregadas polo alumnado, e que non exista unha programación estable de actividades de calidade nin no inverno nin en época escolar", explicou a voceira.

Dende o Grupo Socialista reclaman ao Concello da Laracha a posta a punto inmediata das instalacións do centro sociocultural da Insua de Caión, a ampliación dos horarios de apertura, incluíndo as mañás do centro sociocomunitario, e a posta en marcha dun plan de dinamización con actividades culturais, educativas e deportivas que dean resposta ás necesidades da infancia e da mocidade de Caión e arredores.