Unha das típicas e multitudinarias festas dos Maiores da Costa da Morte Coñecín a unha profesor que unha vez me dixo: “Todo está nos datos, todo. O problema soe ser a mirada do que os utiliza e non ve o evidente”. No caso dos datos que estes días estou a recoller, resumir e analizar pasa algo parecido: é evidente que a Costa da Morte é un “morto vivente”, pero parece que nin os que viven nela o admiten. Como o vello propietario da empresa que acude cada día o seu despacho cando en realidade quen corta o bacallau son os fillos, nin as autoridades locais nin os administradores autonómicos parecen entender que cando un membros se gangrena, acaba por afectar ao corpo enteiro e so existen dúas opcións viables para salvar a vida; amputar ou reconstruír. A semana pasada viamos con cifras claras de que xeito unha xeración enteira ten marchado da bisbarra masivamente nas últimas dúas décadas. Hoxe quero ver a contraposición a iso porque a premisa que plantexo é sinxela: si aqueles que deberían estar gastando e cotizando para manter en marcha a maquinaria económica e comercial da bisbarra fuxen a mancheas, de onde saen os cartos que manteñen en precaria apertura o comercio local? E a resposta é sinxela: das pensións. Os datos do cadro que podedes ver pertencen a analise do IGE para os anos 2011 e 2017 de número de pensionistas e pensión media por perceptor ao mes. De estes datos sacamos varias conclusións sinxelas que apuntalan aínda mais o escenario de morte económica clínica da nosa bisbarra. Imos ao allo. Só en 6 concellos dos 18 da bisbarra hai menos perceptores que en 2011. Son Carnota (-90), Coristanco (-28), Malpica (-10), Mazaricos (-11), Ponteceso (-5) e Zas (-2). Nos outros 12 hai máis persoas que cobran unha pensión (principalmente por xubilación) en 2017 a pesares de que en 10 deles a poboación caeu estrepitosamente nese mesmo período. É dicir, hai mais vellos cobrando e menos xente pagando. Santa Comba (37,40), Vimianzo (38,59) e Cabana (43,32) foron os concellos onde menos se revalorizou a pensión media nos últimos 7 anos. De feito, en Galicia as pensións medraron de media en 110 euros por perceptor ao mes. Ningún concello da Costa da Morte revalorizou de igual xeito as súas pensións. Así, Corcubión (86,27), Fisterra (85,18) e Ponteceso (80,80) foron os concellos onde mais aumentou a pensión media neste período. En 11 dos 18 concellos da bisbarra a porcentaxe de pensionistas supera o 30% da poboación. E en Carnota e Mazaricos case 4 de cada 10 residentes censados viven dunha pensión. Outras porcentaxes elevadas de pensionistas danse en Cabana (34%), Malpica (35%), Ponteceso (34%), Zas (34%) e Coristanco (33%). Onde os pensionistas representan unha menor porcentaxe da poboación é en Carballo (23%), Corcubión (23%) e en Cee (24%). A pensión media máis alta está en Corcubión, onde se cobran 904,96€ ao mes, seguido de Cee (855,74€/mes), Muros (825,43€/mes) e Ponteceso (805,69€/mes). Por abaixo, un veciño de Santa Comba percibe unicamente 621,52€ ao mes, un de Vimianzo 632,75 e un de Mazaricos 634,75€/mes.

Peor pensión no interior

Os datos tamén aportan información importante si atendemos a actividade económica principal de cada concello. Así, os municipios do interior e agricola-gandeiros cobran pensións medias mais baixas que os da costa. En Malpica, Muros ou Fisterra se percibe mais ao mes de pensión que en Vimianzo, Zas ou Mazaricos, cunha diferencia que rolda os 100 euros por perceptor e mes. Ademais, os concellos cunha actividade industrial ou comercial como principal aporte económico perciben as pensións mais altas, en Cee, Dumbría ou Carballo por exemplo, fronte a outros onde o sector primario é a fonte principal de ingresos como en Mazaricos, Santa Comba ou Vimianzo. Caso aparte é o de Corcubión, onde o reducido número de habitantes e a existencia de varios centros de traballo da administración pública ofrece un dato medio extraordinariamente elevado para a media da zona (904,96€/mes).

A media costeira, moi por debaixo da galega

A pensión media na bisbarra no ano 2017 foi de 727,40€ ao mes, 168,84€ menos que a media galega, aproximadamente un 20% inferior a media do que se cobra como pensionista en Galicia. De feito, a pensión media na bisbarra en 2017 é inferior a que se percibía de media en Galicia... en 2011 (785,46). Por explicalo mellor, as pensión da bisbarra non chegaron aínda ao ano 2011, e suman un retraso dunha década con respecto ao resto do pais. De igual xeito, queda claro que Carballo e Cee son os concellos que menos dependen das pensións para soster a súa economía municipal mentres que Mazaricos, Malpica, Carnota, Zas ou Vimianzo depende en relación a que 1 de cada 4 euros do seu capital provén directamente das pensións que cobran os seus residentes. Esta dependencia se acentúa si aportamos tamén a esta ecuación o dato do número de empresas que se reduciu en Vimianzo case nun 3% nese mesmo período. De como cae o tecido industrial na bisbarra falaremos outro dia. Hoxe, celebremos que un ano mais a Costa da Morte se desangra sen que a ninguén lle pareza importante.

• José Luis Louzán.

Outros artigos de José Luís Louzán

https://quepasanacosta.gal/unha-verdade-incomoda-2/ https://quepasanacosta.gal/dias-contados/ https://quepasanacosta.gal/informe-para-evitar-o-desastre-economico-financeiro-da-costa-da-morte/ https://quepasanacosta.gal/debedas-pendentes/

Outras novas relacionadas

https://quepasanacosta.gal/as-pensions-de-corcubion-son-as-mais-altas-da-costa-da-morte/ https://quepasanacosta.gal/se-non-temos-xente-nova-quen-vai-cotizar-para-que-os-maiores-poidan-cobrar-as-pensions/