Na mañá deste venres 15 de abril, no salón de plenos da Casa do Concello, Ángel Eiroa (técnico municipal de turismo), José Muíño (alcalde de Cabana de Bergantiños) e Carlos Conde (profesor de Educación Física no CPI As Revoltas) presentaron o proxecto de Campo de Traballo que se vai desenvolver na última quincena do mes de xullo de 2011 e no que participrán 20 mozos e mozas de 18 a 24 anos que proceden de comunidades de todo o Estado.

A actividade desenvolverase baixo o formato de campamento de verán. Así, os asistentes pernoctarán e realizarán os seus descansos no pavillón municipal. En xornada diúrna, dedicaranse a recuperar o entorno fluvial coñecido co nome de Rego dos Muíños ou do Roncaduiro, espazo que comunica desde a zona do Lodeiro ata o acceso ó castro A Cidá de Borneiro.

Entre os traballos de carácter medioambiental a realizar están a limpeza da maleza e rastrollos do roteiro, a mellora e mantemento de paneis, a identificación da flora, a sinalización do roteiro, o adecentamento de zonas de lecer, a recollida de lixo e o acondicionamento de muíños. Como tarefas etnográficas e patrimoniais a realizar están as de coñecer o funcionamento e as partes dun muíño de regato así como costumes, tradicións e aspectos lingüísticos arredor dos muíños e o seu contorno.

Esta actividade, que organiza o Concello de Cabana de Bergantiños, está promovida pola Dirección Xeral de Xuventude e Voluntariado da Xunta de Galicia.

Fonte

• Nota de prensa do Concello de Cabana.