Rosa Mouzo: "As mulleres de Camariñas levamos o encaixe na pel"

07:20 27/01/16

Rosa Mouzo Pasantes naceu e vive en Camariñas e coñece de primeria man o encaixe e, por suposto, a mostra que se celebra todos os anos na vila. A pesar de ser técnica de Turismo ten unha gran paixón polo deseño gráfico que foi o que a levou a participar na II Edición do Concurso de Carteis da Mostra do Encaixe. Rosa resultou a gañadora despois de que o seu cartel fose o máis votado dos sete que se presentaron no concurso realizado a través das redes sociais.

QPC: ¿Que significa para ti ser a gañadora do concurso de carteis?

Alégrome moito por poder participar nun evento tan representativo da vila de Camariñas. Tanto eu como a modelo estamos moi contentas.

QPC: ¿Quen é a modelo?

A modelo é Mayte Castro, unha amiga que tamén é de Camariñas. Ela é unha modelo aficionada que participou xa en varios desfiles.

QPC: ¿Que te animou a participar no concurso?

A miña pandilla de amigos foi quen me animou a participar no concurso. Saben que me gusta o deseño e que fixen traballos colaborativos con outras asociacións. Así que foron eles quen me deron o empuxón para presentar o traballo.

QPC: ¿En que te inspiraches?

Tiñamos varias ideas en mente, pero un día Mayte - a modelo do cartel - e eu acompañamos a unha amiga a unha tenda de "percings". Alí vimos distintas imaxes de tatuaxes e foi onde asociamos os "tatoos" co encaixe. A partir desta idea fixemos as fotos.