A aposta pola calidade e o servizo segue dando froitos na Costa da Morte, tras o recente recoñecemento a 35 establecementos locais polo seu compromiso coa mellora continua dos servizos turísticos, no marco do Sistema Integral de Calidade Turística Española en Destinos (SICTED). Entre os distinguidos neste necesario proceso de profesionalización do sector, figura unha crecente oferta gastronómica que comezou a captar a atención das guías especializadas é a Guía Repsol 2025.

A visibilidade alcanzada pola rexión vese reforzada polo recente respaldo de dous referentes internacionais do mundo culinario. A Guía Repsol 2025 incluíu a varios restaurantes da zona entre as súas recomendacións, mentres que a Guía Michelin fixo o propio, consolidando a imaxe de Costa da Morte como destino con identidade gastronómica propia, máis aló das súas paisaxes naturais e patrimonio cultural.

Entre os establecementos recoñecidos atópase o restaurante La Marina de Camariñas, incluído nas recomendacións da Guía Repsol 2025, consolidando a súa posición como unha das referencias gastronómicas da zona. Cunha cociña baseada no produto local e unha atención moi valorada pola súa proximidade e profesionalidade, La Marina representa un exemplo do avance do sector hostaleiro nesta zona.

Óscar Freire, xerente do restaurante, valora positivamente este impulso colectivo: “Na Costa da Morte somos xa uns cuantos que apostamos por unha cociña feita con cariño, con atención ao detalle e ao comensal, e isto empeza a notarse. Este ano o aumento de reservas xa se está producindo”. Un testemuño que reflicte o momento que vive o sector na comarca.

Este tipo de recoñecementos contribúe a reforzar o posicionamento da Costa da Morte como un destino turístico completo, cunha oferta gastronómica cada vez máis sólida e recoñecida fóra de Galicia, que reforza a competitividade do destino e abre oportunidades para atraer a un visitante que busca autenticidade e calidade.

Máis novas