O #FIOT30 estrea en Sala e no móbil

Imaxe da obra "Déjà vu" que se estrea esta finde - @Raquel Garcia

O #FIOT30 estrea en Sala e no móbil

07:32 01/10/21

Primeira fin de semana completa da 30ª edición do Festival Internacional Outono de Teatro de Carballo. E chega con tres estreas absolutas e a apertura do Programa de Sala da man dunha das compañías máis queridas polo público de Carballo: a Cía. Manolo Alcántara presentará Déjà vu, peza gañadora do FETEN 2021 á adaptación de técnicas circenses á nova dramaturxia.

Mais a fin de semana comezará coa estrea absoluta de O espello que arde (venres 1 de outubro, ás 19.00 e 20.00h), o proxecto protagonista da segunda edición do FIOT Fónico, a liña de programación coa que o certame experimenta con novas linguaxes e conxuga as artes escénicas co espazo urbano. Así, o espazo público de Carballo torna en protagonista da escenografía dunha peza de trama policíaca que se pode escoitar a través de dispositivos móbiles e que, nesta ocasión, é obra de María Lado. Marcos PTT, a propia María Lado, o director, Quico Cadaval, e algúns dos intérpretes estarán na estrea desta obra que terá lugar todos os venres e sábados de outubro, ás 19.00 e 20.00h, así como os domingos e festivos do mes (día 12), ás 13.00 e 19.00h.

Estreas na Rúa dos Contos

Imaxes da primeira fin de semana. de Rúa dos Contos

Por outra banda, a proposta máis atrevida e retranqueira do FIOT, a Rúa dos Contos, suma a súa segunda fin de semana, e faino con dúas estreas absolutas: Desta sairemos mellores, que Ángela Triana interpretará o 1 de outubro, ás 21.00h, no Espazo Xove de Carballo; e A parábola do anganzo, de Talía Teatro, que a compañía presentou onte.

O programa da Rúa dos Contos para esta fin de semana completarase con funcións de Sexo débil, o carallo!, de Arantxa Treus (día 1, no Casino 1889, ás 23.00 horas) e Camiños, de Paula Carballeira (domingo 3, ás 20.00 horas, no Mercado Municipal).

Comeza Teatro de Rúa

Este venres, 1 de outubro, tamén dará comezo outra das liñas de programación do FIOT abertas a todos os públicos: Teatro de Rúa, o programa de artes escénicas e artes circenses que se espalla polas rúas de Carballo. A compañía galego-arxentina A Vela Circo será a responsable de presentar ao público o seu primeiro espectáculo A corda, cunha orixinal e divertida posta en escena ateigada de circo do absurdo, caos, humor e poesía para toda a familia.

Venda de entradas para o Programa de Sala

Este martes, 28 de setembro, activouse a venda dos bonos do Programa de Sala, os billetes para todos os espectáculos desta liña de programación. O xoves, 30 de setembro, a partir das 17.00 horas, saíron á venda as entradas individuais para o Programa de Sala e tamén para outra das grandes novidades desta 30ª edición: o FIOT en Ruta, dous espectáculos coas compañías Berrobambán (A carreta pantasma) e Chévere (As fillas bravas e o mito de Casandra) e que terán lugar os días 8 e 12 de outubro nos centros sociais de Cances e Berdillo.