Xa pasou polo Parlamento da man do BNG pero a resposta da Xunta non foi alentadora. Desta volta é o PSOE o que leva ao Parlamento de novo a reforma do salón de Actos do IES Alfredo Brañas de Carballo.

Foi a parlamentaria viguesa Noelia Otero a que urxíu a Xunta as melloras no centro. Os problemas da sala, lamentou, “veñen de longo”, xa que no ano 1997 xa se detectou unha praga de couza na totalidade da madeira e as solucións achegadas naquel momento “non deron resultado”, polo que “o problema quedou latente”. Finalmente, incidiu, o pasado mes de xuño parte do falso teito veuse abaixo como consecuencia da humidade; co cal, “á vista das grandes deficiencias, cómpre unha actualización profunda”, sentenciou.

Pide tamén a reforma da fachada, sen tocar dende 1996, e lembran que o Alfredo Brañas é o decano dos IES carballeses sendo ademais unha “referencia” na provincia que provocou que, a finais dos anos oitenta, acadara unha “sonada masificación”, chegando as superar as 1.200 alumnas e alumnos.

Novas relacionadas

• Marzo 22: A Xunta arranxará o salón de actos do IES Alfredo Brañas “cando haxa dispoñibilidade orzamentaria”.
• Novembro 21: O BNG carballés esixe actuacións urxentes no esfolado Salón de Actos do IES Alfredo Brañas.