Non necesitan presentación, pois Talía Teatro é un dos grandes clásicos do FIOT. A compañía ceense presentou onte en Carballo a súa nova “A parábola do anganzo”, que pecha a triloxía que arrincaba en 2002 con “Bicos con lingua”, o espectáculo referente da compañía con case 400 funcions, e que continuou dende 2011 con “Pelos na lingua”.

”Esta obra parte da identidade propia da compañía, do compromiso coa lingua galega”, sinalaron tanto Artur Trillo, como Toño Casais (ambos actores da peza) como Diego Rey, director, durante a presentación oficial na que estiveron acompañados de Alberto Sueiro, presidente da entidade organizadora e Marcos Trigo, concelleiro.

”Nós pensabamos que era un espectáculo tendencioso, demagóxico… pero acabou tendo unha aceptación espectacular, moi útil no ensino, para secundaria”, sinalaron.

A peza (que poderá verse o sábado 2, ás 22.00h, e o domingo 3, ás 19.00h, no Salón de Actos do Pazo da Cultura) parte dunha recollida polo Padre Sarmiento no século XVIII, na que un mozo que emigra a Castela, á súa volta ao fogar, esquece a súa lingua nai: o galego.

Os dous protatonistas farán unha viaxe pola historia da nosa lingua, a través dun diálogo fluído e cargado de humor, enlazando episodios do noso pasado para explicar o que sucede no noso presente.

Precisamente Talía Teatro -compañía gañadora do Premio do Público 2010- desenvolveu, nas últimas semanas, unha residencia no Pazo da Cultura para a preparación deste novo espectáculo, unha proposta áxil e versátil, con textos de Araceli Gonda, Sechu Sende, Ana Carreira ou María Lado, entre outras voces. Ademais, tal e como recordou Alberto Sueiro, “A parábola do angazo” será o eixo da programación do FIOTeen, dirixido especificamente aos adolescentes da comarca e que se desenvolverá nas últimas semanas de outubro.  

NOVAS RELACIONADAS

• 2021: A Rúa dos Contos abre este venres o FIOT.
• 2021: #FIOT30: Volve, con todo e pensando no pobo, o Festival Internacional de Outono de Teatro de Carballo
• 2020: A innovación do #FIOTenpausa achegou o teatro ás novas xeracións.
• 2020: O FIOT innova por pandemia.
• 2020: “A ficción sonora “A lúa, válvula de spray” crea un discurso artístico coa cidade”.
• 2020: Carlos Alonso, Xograr de Outono desta singular edición do #FIOTenpausa 2020.
• 2019: As impresionantes cifras do FIOT, a maior oferta teatral de Galicia.
• FIOT 2018: O FIOT, o maior festival de teatro de Galicia, pecha cun 98% de ocupación achegándose á mocidade.
• Setembro 2018: O FIOT recibe o premio da Cultura Galega de Artes Escénicas.