Carnota, Laxe e Ponteceso lánzanse ao teatro por outono
Temos loubado en innumerables ocasións a aposta pola programación teatral continua de concellos de Vimianzo, Muros, Carballo… Programas que serven como auténticos dinamizadores culturais da bisbarra e que fomentan o consumo de actividades de lecer máis enriquecedoras.
Esta semana os concellos de Carnota, Laxe e Ponteceso presentaron os seus completos programas dos seus ciclos de teatro de outono.
XII edición do Mostra de Outono de teatro de Laxe
En marcha está a XII edición do Mostra de Outono de teatro organizada en colaboración coa Asociación Folerpas Teatro. Os asistentes terán a ocasión de desfrutar de representacións teatrais de gran calidade. Tódalas obras serán ás 19:00 horas no salón de actos municipal.
As representacións serán as seguintes:
- Domingo 21 de outubro: a Compañía Malasombra e coa obra “Os fabulosos cleaners“.
- Domingo 28 de outubro: Sen cancelas teatro e a obra: “2010”.
- Domingo 4 de novembro: Metatese Teatro de Palas de Rei e a obra “Dora e lola”.
- Domingo 11 de novembro: Grupo de teatro APEM de Carballo e a obra “Cambiouche ben o conto”.
XXV Mostra de Teatro de Ponteceso
Durante o mes de novembro celébrase a 25ª edición da Mostra de Teatro de Ponteceso. O vindeiro martes 30 de outubro farán a presentación oficial, pero xa sabemos as obras, que darán comezo ás 22.30 horas no salón de actos do Edificio das Escolas, e as entradas custarán 3,06€ (poden reservalas na Tesourería do Concello.
O sábado 3, a compañía encargada de inaugurar o certame será Talía Teatro, trae unha revisión do clásico “O servidor de dous amos”.
O sábado 10 correrá a cargo de Contraproducións, que presentará “Os fillos do sol”, unha elucubración teatral sobre a figura de Eduardo Pondal e a súa obsesión coa obra que centrou toda a súa vida como escritor: Os Eoas.
O sábado 17, tamén Contraproduccións traerá “Commedia”, unha peza que cumpre tamén 25 anos sobre os escenarios.
E xa o sábado 24, a compañía coruñesa Os Náufragos porá o broche de ouro ao certame coa súa carta de presentación, “Castrapo”, unha proposta actual e próxima ao espectador que narra a viaxe ás orixes, ás raíces.
Noistes espectaculares en Carnota
O Concello de Carnota saca unha programación cultural para público adolescente/adulto destes meses (de novembro a xaneiro) no Concello de Carnota. As Noites Espectaculares serán as seguintes, sempre ás 20:00 no Salón de Actos do Concello:
- Venres 2 de novembro ás 20:00 h: Monólogo de Quico Cadaval con “Os inocentes”, dentro da programación da Rede Cultural. - Venres 14 de decembro ás 20:00 h: Proxeción da película Sicixia, de Ignacio Villar. - Venres 28 de decembro ás 20:00 h: Teatro Os Quinquilláns con “Language Planning”, dentro da programación da Rede Cultural. - Venres 11 de xaneiro ás 20:00 h: Teatro con Isabel Risco, “Nabiza Girl”, dentro da programación da Rede Cultural.
