campana-quen-dixo-medo Corenta concellos da Coruña participarán na campaña de sensibilización contra a violencia de xénero que promove a área de Igualdade da Deputación da Coruña. “O medo paraliza e nós queremos que as mulleres teñan ferramentas para vencelo”, dixo a deputada Ánxela Franco na presentación da nova iniciativa. Entre os concellos costeiros que participan na iniciativa están os de Malpica, Ponteceso, Vimianzo, Zas, Cee, Muxía, Dumbría, Santa Comba, Carnota e Muros. “Quen dixo medo?” é o título da campaña que a área de Igualdade da Deputación da Coruña desenvolverá durante este ano 2017 e o vindeiro 2018 para sensibilizar contra a violencia de xénero. A deputada responsábel da área - Ánxela Franco - presentou a iniciativa explicando que é preciso “vencermos ese medo que paraliza e que nos impide responder con contundencia contra o terrorismo machista”. A deputada afirmou que, desde a área de Igualdade da Deputación, “non se aforrarán esforzos para loitar contra a violencia de xénero”, e, nese sentido, impulsa esta nova campaña que se dirixirá a corenta concellos da provincia e se prolongará ao longo de dous anos co obxectivo de sensibilizar á sociedade, desmontar mitos e estereotipos en torno á violencia e visibilizala ademais de fomentar o cambio de crenzas e actitudes e dotar á poboación e mecanismos, coñecementos e habilidades para detectar as diversas manifestacións da violencia de xénero. Destinatarios A campaña diríxese especialmente á poboación infantil e xuvenil mais tamén hai liñas de actuación dirixida á xente adulta tendo como obxectivo acadar ás 6.000 persoas participantes. “A formación é a mellor ferramenta para rematar con estes grandes medos e eliminar a violencia de xénero”, defende Ánxela Franco e, por iso, a campaña nútrese de maneira especial de accións informativas e formativas, con atención á idade infantil e adolescencia. “Unha das liñas de traballo é a de sensibilización con adolescentes en relación coas novas tecnoloxías. Detéctase un problema grave no ensino secundario e ese é un dos obxectivos desta campaña”, sinalou Xosé Ares, técnico do programa “Quen dixo medo?”. A técnica de Igualdade - Eva Ovenza - lembrou que a Deputación da Coruña está a traballar tamén nun programa socioeducativo con adolescentes a través do que se evidencia, entre outras cousas, que neses idades non se está a identificar a violencia de xénero á marxe do maltrato físico. “Indícanos que temos que seguir a traballar neste tramo de idade mais tamén é necesario implicar as familias e por iso este programa diríxese a toda a poboación”, explicou. Novas relacionadas

• A Deputación pon en marcha un novo programa contra a violencia de xénero
• #25N: Erradicando a violencia de xénero
• #25N: A loita contra a violencia de xénero dende os escaparates

Fonte

• Redacción QPC (info@quepasanacosta.com)
• Deputación da Coruña