Reunión do antigo GAC 4, agora GALP Costa Sostible, en Muros

Seguen os Grupos de Acción Costeira separando en dous a Costa da Morte. Desta volta tocoulle a zona sur reunirse para analizar como chegan as axudas europeas nos vindeiros 4 anos. E tiña unha boa oportunidade a UE para unificar os recursos nun territorio común, co cambio de nomenclatura. Xa que a aptándose á nova normativa europea, o Grupo de Acción Costeira pasará a converterse no GALP, Grupo de Acción Local do sector Pesqueiro. Ademais cambia a súa anterior denominación GAC Seo de Fisterra-Ría de Muros-Noia pola de GALP Costa Sostible, substituíndo a referencia territorial por toda unha declaración de intencións respecto ao modelo de territorio. O GALP inclúe a un total de 39 entidades, entre as que están todos os concellos e confrarías de pescadores e a maioría das asociacións profesionais, sociais e culturais do mesmo territorio, os concellos de Fisterra, Cee, Corcubión, Dumbría, Carnota, Muros, Outes, Noia e Porto do Son.

Xuntanza en Muros

Había reunión en Muros da Xunta Directiva do GAC 4- Seo de Fisterra-Ría de Muros-Noia, na que participaron representantes de Confrarías, Concellos e organizacións empresariais e sociais dos 9 concellos.

A orde do día incluía a aprobación da EDLP - Estratexia de Desenvolvemento Local Participativo. É o documento de planificación dos novos fondos europeos, o Fondo Europeo Marítimo e da Pesca (FEMP), de aquí ó ano 2020, que leva preparándose durante 4 meses.

O documento aprobado define criterios que rexerán a concesión de axudas a proxectos públicos e privados:

O Territorio Costeiro Sostible como aposta. A Estratexia parte da idea de crear un modelo de crecemento sostible a nivel económico, social e medioambiental. Recolle a aplica ao territorio diversos principios defendidos pola UE e que os membros do GAC asumen para a nosa zona:

• A Especialización Intelixente, baseado na potenciación daquelas actividades económicas nas que podemos ser máis competitivos. Ademais, o facemos integrados na política de especialización defendida pola Xunta na estratexia RIS3 Galicia e que inclúe a xeración de valor engadido no sector pesqueiro, o turismo, as novas tecnoloxías e os servizos sociais.
• O Desenvolvemento Local Participativo, que implica traballar coas institucións e entidades sociais e económicas da zona para definir as políticas, captando ideas e iniciativas e favorecendo unha toma de decisións acorde coas necesidades reais.
• O Crecemento Azul, tamén impulsado pola Unión Europea que busca un enfoque do crecemento das zonas costeiras que parta dun enfoque integral de aproveitamento das posibilidades do mar: pesca, industrias asociadas, turismo costeiro, etc.

Obxectivos estratéxicos da EDLP

A EDLP marca 4 Obxectivos Estratéxicos.

• 1. No Sector Pesqueiro, a busca dun modelo mais eficiente e sostible, baseado no valor engadido, na diversificación e no reforzo da transformación e comercialización.
• 2. No Turismo, o aproveitamento da identidade costeira e mariñeira para crear unha oferta diferenciada e competitiva.
• 3. A Diversificación Económica e Calidade de Vida co apoio a iniciativas con especial incidencia na economía do coñecemento.
• 4 A posta en valor do Patrimonio Natural e Cultural presta especial atención á franxa litoral, que soporta grande presión humana.

Presuposto

A EDLP aspira a xestionar axudas por valor de 16.000.000 €, a xestionara ata o 2020. Os principais capítulos irán destinados aos sectores da Pesca e Turismo.

• Beneficiarios das axudas. Poderán ser beneficiarios das axudas calquera promotor privado ou público.
• Axudas. As iniciativas de carácter empresarial poderán obter unha axuda de ata o 50% do presuposto, segundo oo regulamento do fondo Europeo da pesca que poderá ampliarse ó 60% si as bases reguldoras da convocatoria o contemplan cun límite de 500.000 €, ampliable ata 1.100.000 € se teñen especial repercusión na xeración de emprego. Para os proxectos públicos de especial relevancia cultural ou social, o apoio pode chegar a o 100%. E, atención, como novidade, darase importancia na valoración dos proxectos aos compromisos adquiridos polo promotor no eido da Responsabilidade Social Corporativa, é dicir, na aplicación de medidas concretas para defender os valores do crecemento sostible e implicado coa sociedade.
• Procedemento de aprobación e xestión. Trala aprobación da EDLP o pasado mércores pola sembleA do GAC, está será enviada á Consellería do Mar (Dirección Xeral de Desenvolvemento Pesqueiro), que realizará a valoración final E ASINARÁ O ORZAMENTO DEFINITIVO SEGUNDO A VALORACION OBTIDA. Unha vez ratificada, constituirase o novo GALP Costa Sostible para a súa xestión; se todo vai ben a primeira convocatoria de axudas quedará aberta na primeira metade de 2016.

Fonte

• Nota de prensa do GALP Costa Sostible.
• Redacción de QPC ([email protected]).