Novas hipóteses dan vida á Ermida do Monte Pindo

Novas hipóteses dan vida á Ermida do Monte Pindo

19:02 23/02/16

Misteriosa Inscrición da Ermida do Monte Pindo

Moitas veces temos falado da historia da ermida do Monte Pindo. E pouco a pouco imos coñecendo máis cousas. Desta volta, a Asociación Monte Pindo Parque Natural dá conta dunha nova hipótese.

Segundo a entidade, Helena Gimeno, experta epigrafista da Universidad de Alcalá vén de referirse ao gravado granítico, sinalando que podería indicar “† ERA 1140”, é dicir, ano 1102 da nosa era. A experta, consultada grazas á mediación do licenciado en Historia e doutorado en Historia Medieval pola USC, José Carlos Sánchez Pardo, amosouse interesada en confirmar esta lectura in situ.

Sobre o feito de que a inscrición se atope ao revés, coma se fixese falta un espello para podela ler correctamente, o que acrecenta o misterio en torno ao gravado, a experta da Universidade de Alcalá amosouse desconcertada, asegura que é a primeira vez que ve unha inscrición similar e que a única explicación que se lle ocurre é que se deba a un erro da persoa encargada de gravar o texto.

Este feito abre a posibilidade dunha nova hipótese sobre a ermida. Se ben parece que doi construída no ano 830, pode ser que a inscrición se fixera durante unha recostrución. En todo caso, se efectivamente falamos do ano 1102, a ermita tería cando menos nove séculos de historia e situaríase coherentemente coa auxe do Monte Pindo e do Condado de Carnota na Idade Media, e nomeadamente coas primeiras referencias ao Castelo de San Xurxo, sito no pico veciño do Pedrullo, como testificaba en 1109 Pedro Froilaz de Traba, o patriarca da Casa de Traba. Deste persoeiro pode vir ademais o novo da praia do Pindo (San Pedro), así como a igrexa construída durante séculos ata a construción da nova na honra de San Clemente.

Moitas novas hipóteses arredor do máxico Olimpo Celta, que deberían ser estudadas con medios.