Outro ano máis achégase o 8 de marzo e a loita da Muller non decae. Máis ben todo o contrario, con 17 mulleres asesinadas no que vai de ano. A violencia machista volve con máis forza, sendo a xuventude un dos focos máis preocupantes onde agroma esta miseria. Non mellora a cousa se falamos do mercado laboral, nas baixas nin nas altas esferas, pois nin melloran os salarios, nin vemos máis caras femininas nos núcleos de poder. Así chega un novo Día Internacional da Muller, e na Costa da Morte son moitas as accións que se realizan para celebrar a data. Citas entre as que sempre temos que destacar as artelladas pola única entidade integramente feminista da bisbarra, a Organización Buserana. Así, este mércores 8 de marzo, ademais da tradicional concentración e da lectura do manifesto na praza 8 de marzo de Cee (onde si non), pouco despois haverá un vídeo-coloquio no Rock Corner Basr ceés con Claudia Brenlla.

En vídeo

A Deputación quere sumarse á data con este "Hemisferios. 8 mulleres, 8 voces, 8 de marzo". Uxía, Pilocha, Alba María, Belem Tajes, Ugia Pedreira, Silvia Penide, Sonia Lebedinsky e Carmen Rey, as protagonistas.

Citas co CIM de Cee

Así mesmo dende o Centro de Información Municipal á Muiller van realizar diferentes actividades. Haberá un almorzo/debate a partir das 10:15 no Centro Social con Josefa Lema, a primeira muller concelleira da democracia en Cee. Ás 12:00h realizarán a súa concentración e lectura do manifesto co apoio dos escolares, e ás 14:30h procederase á inauguración na Casa da Culturada exposición de fotografía do corcubionés Senén Insua “Por elas, por nós”. Ademais, o día 16 toca algo de maxia pola igualdade con Fani Triana ás 11:30 na Casa da Cultural para os alumnos da vila, así como día 23 con Pedro Brandariz.  

Día para concienciar dende o berce en Zas

O Concello de Zas organiza unha sesión de contos pola igualdade que, baixo o título “Somos iguais”, está dirixida a alumnos e alumnas da etapa infantil e primaria dos centros educativos do municipio. Raquel Queizás será a encargada de narrar historias que transmiten valores de igualdade, respecto e convivencia entre nenos e nenas e entre mulleres e homes. As sesións, de 50 minutos de duración, realizanse mañá martes ás 10:30 horas co CPI de Zas e ás 12 horas no CEIP Labarta Pose de Baio.  

Exposicións para a coeducación en Corcubión

Será tamén o corcubionés Senén Insua o protagonista deste 8 de marzo, pois súas serán as exposicións que abre a Concellería de Muller e Igualdade do Concello de Corcubión. Dúas exposicións que pretenden facer unha labor de sensibilización e concienciación da cidadanía en xeral dende a perspectiva do seu autor que se suma a celebración desta Data colaborando co seu traballo de forma desinteresada . Por un lado “FEMME” que se exporá no Auditorio Capela do Pilar, a inauguración da mostra será o vindeiro mércores 8 de marzo, ás 19.00 horas e estará acompañada da poesía do poeta corcubionés Serxio Iglesias. A outra exposición “Por elas, por nós”, está exposta na Casa do Concello dende o 1 ao 12 de marzo. Xa o vindeiro 31 de marzo continúa o programa cunha actividade de coeducación na igualdade, a obra de teatro “Rosa Caramelo” de Talía Teatro dirixida a poboación infantil de entre 3 e 10 anos e as súas familias.  

Xornadas Guerrilleiras en Carballo

Este ano o Concello de Carballo quere resaltar o enfoque máis combativo e reivindicativo do Día Internacional da Muller, e con esa finalidade as concellarías de Igualdade e Cultura suman esforzos nas “Xornadas Guerrilleiras”, que se desenvolverán ao longo de todo o mes cun completo programa de actividades para todo tipo de públicos. Na semana do 6 ao 10 de marzo desenvolverase o obradoiro “Sen Diferenzas”, que convida ao alumnado dos IES a reflexionar sobre a influenza dos mandatos de xénero na elección da formación e da profesión, no que trataremos de eliminar os estereotipos e os factores que inflúen nunha elección sesgada, propiciando unha toma de decisión máis libre, responsable, autónoma e axustada á realidade do mercado laboral. Outra das intervencións de reflexión e formación propostas dende a área de Igualdade é o proxecto “Igualando Carballo”, destinado a alumnado de 4º de Primaria, que consta dunha serie de actividades en cada un dos colexios do concello. Paralelamente convocarase o primeiro concurso “A historia das mulleres do Concello de Carballo”, orientado a que os rapaces e as rapazas investiguen sobre a vida de personaxes femininas vinculadas dalgún xeito ao noso concello. Na Biblioteca Rego da Balsa desenvolveranse boa parte das actividades programadas, entre ela a exposición “A muller a través da arte”, que estará aberta do 6 ao 31 de marzo, e dous obradoiros tamén artísticos: “Debuxando a igualdade”, para nenos e nenas, que se celebrará o día 7 ás 18 horas, e “Mural feminino”, unha proposta creativa para a semana do 13 ao 18 de marzo que servirá como base para a creación do “Recuncho da Igualdade”, unha sección nova da biblioteca con todo tipo de publicacións relacionadas co tema e que tamén responden ao espírito reivindicativo que trata de fomentar o Concello de Carballo, “porque é algo no que cremos e que obedece a unha situación que se debe mellorar”, apuntou Marcos Trigo. Outra das citas potentes do mes de marzo será o “Faladoiro coas guerrilleiras”, que reunirá o día 8 ás 19.30 horas á concelleira Milagros Lantes, a poeta Rosalía Fernández Rial, a escritora Mercedes Queixas, a deportista Merce Barrientos, a psicóloga Belén Álvarez Sande, a crítica literaria Chus Nogueira e a cantautora MJ Pérez, autora do tema que dá nome ao faladoiro e ao programa. Será un acto aberto de debate e de intercambio de experiencias, na mesma liña do Encontro de Mulleres que se desenvolveu o ano pasado no marco do InFórum WorkIN Carballo.

Un mes de cultura en clave feminina en Vimianzo

Co gallo da conmemoración do 8 de marzo, o Auditorio da Casa da Cultura de Vimianzo acolle neste mes un pleno de espectáculos teatrais en clave feminina.

As do peixe (Contraproducións) abrirán este mes, o vindeiro sábado día 11, cun espectacúlo onde catro mulleres concretas, ex-traballadoras dunha conserveira, representan unha memoria colectiva das mulleres reais. Na escena catro recoñecidas actrices do panorama teatral galego: Casilda Alfaro, Mónica Camaño, Rocío González e Susana Dans. O seguinte sábado, día 18, Voaxa e Carmín (Butaca Zero), a tenra e dura a un tempo historia das Dúas María de Compostela tomará vida a través de Mabel Rivera e Belén Constenla, cun texto de Esther Carrodeguas, todas elas nomeadas aos Premios de Teatro María Casares. E pechan o mes, o sábado 25 de marzo, con Chévere, que en clave  de humor típica da compañía, reafirman modelos de empoderamento da muller, a través de tres actrices: Patricia de Lorenzo, Mónica García e Arantza Villar que cantan e contan o ques lles dá a gana no espectáculo As fillas bravas.

De Mulleres deportistas en Muxía

Muxía, para celebrar este 8 de marzo, está desenvolvendo un Concurso de debuxos “Pedaleando pola igualdade”. Os alumnos dos CEIP Os Muiños e CEIP Vilarmide xa presentaron as súas propostas, e os seleccionados formarán parte diunha exposición que estará do 13 ao 18 de marzo na Biblioteca Municipal, xunto á Exposición fotográfica “Muller e Deporte” cedida pola Asociación MUDEGA de mulleres deportistas galegas. O horario de visita será de 16:00h a 19:00h. Volvendo ao propio mércores 8 de marzo, o CIM organiza a habitual concentración baixo o balcón do edificio consistorial, ás 12 da mañá, presentada a cargo da Concelleira da Muller, Mónica Vilela. E o día máis completo será o 18 de marzo, cunha charla, ás 10:45h, sobre o deporte feminino por Mercedes Barrientos, e unha marcha cicloturista reivindicativa a partir das 11:45h polo casco urbano muxián.  

Os rapaces, protagonistas en Camariñas

Os alumnos de Educación Primaria do municipio de Camariñas conmemorarán o vindeiro mércores 8 de marzo o Día da Muller con varios obradoiros no pabellón polideportivo da localidade. Participarán todos os escolares desde primeiro a sexto curso de Primaria dos colexios O Areal de Camariñas e o CEIP da Ponte do Porto e a escola unitaria de Camelle. As actividades comezarán ás dez da mañá e rematarán ás dúas da tarde. Os rapaces traballarán en varios equipos onde se analizará a situación da muller en varios países do mundo e farase unha reflexión conxunta sobre o asunto. Por exemplo, referiranse á vestimenta da muller nalgúns países como Arabia Saudí e logo promóvese unha reflexión crítica sobre as mulleres neste país, onde se negan os seus dereitos fundamentais. Tamén se abordará o caso de España, onde a pesares de haber diversas políticas de igualdade segue habiendo moitas diferencias entre homes e mulleres, como o referido ós salarios, á violencia machista, ás tarefas do fogar... Os escolares pintarán un mapamundi con reflexións referidas a diferentes países, que logo poderán seguir traballando nas súas respectivas aulas. O principal obxectivo deste tipo de actividades é promover unha análise crítica sobre a situación da muller en todo o mundo para loitar contra as desigualdades en materia de xénero que aínda seguen vixentes.

Teatro en Laxe

As Avoas disfrutaron da súa estrea no escenario En clave de teatro celebra Laxe o Día da Muller. Co salón de actos laxense a tope, a Escola de Avoas de Laxe subían por primeira vez ao escenario para representar a "Segunda Oportunidade". A obra, fala do importantísimo papel que fai para as familias as avoas, que son mestras, enfermeiras, economistas, modistas, psicólogas. Ademais, este mércores farán a representación no CPI Cabo da Area para os alumnos, e haberá tamén unha charla sobre violencia de xénero. Xa para o domingo, "Marcha Saudable".  

Novas relacionadas

• A Buserana critica a publicación do artigo “Víctimas de su sexismo”.
• A Buserana lamenta os últimos tres asasinatos machistas
• #25N: Erradicando a violencia de xénero.
• A fisterrá Lucía Costa fai unha rapsodia fotográfica á muller.
• #25N: Os estudantes súmanse á loita contra a violencia de xénero.
• #25N: A Buserana volve saír á rúa contra a violencia de xénero
• #25N: A loita contra a violencia de xénero dende os escaparates.
• Máis de cen establecementos de Zas tinguiranse de negro para loitar contra a violencia machista
• Carballo e Zas súmanse á campaña “En negro contra a violencia”
• /a-buserana-rexeita-as-ofertas-de-emprego-sexistas/.
• O día da Muller deixa poucas celebracións e moitas reclamacións na Costa da Morte.
• O Día da Muller, esa data que non debería existir
• I Gala Solidaria do Día da Muller: Implicadas en que o Día da Muller non sexa unha efeméride.
• 29-01-16: Basta Xa! Berremos ata que non haia máis violencia contra as mulleres.
• As Buseranas alzan a voz contra o machismo tras un verán negro.
• A Buserana alza a voz contra a Violencia de Xénero e critica que non se trate como asunto político prioritario.
• A Costa da Morte segue tecendo redes pola igualdade real da Muller.
• Un percorrido pola historia, dende Muxía, en clave feminina.
• Buserana cumple 15 anos loitando polos dereitos da Muller.
• Buserana pide un Rincón Violeta na nova Biblioteca de Cee.
• 25-11-16: #25N: Malpica plántalle cara á violencia de xénero cun lipdub

Fonte

• Redacción QPC ([email protected])