Rocío Leira acolle con gran ilusión este premio que consiste na edición do poemario

Non podía despedir de mellor maneira o 2015 despois de que fose neste ano cando saíse á luz segunda novela infantil: “O becho que quería comer á avoa”.  Rocío Leira Castro (Pereiriña - Cee), coa súa obra "Obituario", presentada baixo o pseudónimo de Xanela, resultou a gañadora do III certame de Poesía Xosé M. López Ardeiro, que tivo lugar o pasado venres no concello de Negreira.

Entre tres obras finalistas, estan aparte de "Obituario", "Versos de amor e norte", de Cristina Negreira Barcia, de Negreira, e "Mexacáns do Tambre", de Xosé Antonio Grela, de Santiago de Compostela.

O premio consiste na edición do poemario gañador por parte da Secretaría Xeral de Política Lingüística, e a entrega de 150 exemplares nun acto a desenvolverse na vindeira primavera en Negreira. "Este premio supón un paso importante na miña carreira, pois vai ser o meu primeiro libro de poesía para adultos que ve a luz", asegura Rocío Leira.

O xurado - formado por José Antonio Ponte Far, Xulio López Valcárceln María López Sandez e María Rey - destacou da obra a forza das imaxes poéticas, así como a mirada poliédrica sobre un tema tan actual como a violencia de xénero. "A obra está baseada nun conxunto de poemas, e cada poema sobre a morte dunha muller que cita nun primeiro momento xunto coa data en que foi asasinada", salientou José Antonio Ponte Far, presidente do xurado e amigo persoal de Ardeiro.

"Obituario" consta de 41 poemas, cada un deles encabezado polo nome dunha muller asasinada no 2015, e nos que se ofrecen, a través da linguaxe poética,  distintas perspectivas dunha lacra social como son os feminicidios.

Pola súa banda, o alcalde de Negreira, Jorge Tuñas Caamaño, declarou na súa intervención no acto que o concello iniciará trámites para solicitar que as Letras Galegas 2017 estén adicadas a Ardeiro.

Máis premios

Éste non é o único premio co que a ceense despide o seu ano literario; xa que recentemente lle comunicaron ser a gañadora do segundo premio da XXIX edición do Certame Rosalía de Castro de Cornellá, que dende hai case trinta anos convoca a comunidade galega de Cataluña.

O certame ó que se presentaron máis de 260 obras, tiña como membros do xurado a persoeiros coma Xurxo Souto ou  Anxo Angueira - presidente da Fundación Rosalía de Castro -.

O poema presentado por Rocío Leira baixo o título "Lume no peito" combina elementos culturais galegos e cataláns e versa sobre a dualidade de sentimentos que pode sufrir alguén na diáspora. Entremedias, numerosas referencias a Manuel Oreste Rodriguez López, poeta galego cunha relación moi estreita coa comunidade galega emigrada en Cataluña.

Novas relacionadas

• Rocío Leira: “Escribir sobre o cancro sempre é difícil, pero se está orientado ó público infantil a dificultade é maior”
• A ceense Rocío Leira tamén estrea novo libro de literatura infantil
• Modesto Fraga publica os seus 20 anos de poemas á mar.
• Suso Lista publica o seu segundo libro, Xeixos, con sabor ao mar salgado de Corme.
• Modesto Fraga presenta o seu novo libro cheo de Fisterranía.
• O Batallón Literario da Costa da Morte revive na rede.
• Modesto Fraga, Rocío Leira e Lola Canosa, expoñentes da homenaxe poética aos Faros da Costa da Morte.

Fonte

• Redacción QPC (info@quepasanacosta.gal)