Todas as cores unidas a un só berro: #CorcubiónPartidoXudicial.

Así dá gusto ver á vila de San Marcos, unida por unha causa que nos afecta a todos, salvando as diferencias políticas e familiares que no día a día interrumpe o desenvolvemento da bisbarra. Foi o BNG o que lanzou a campaña e o que fixo a convocatoria, pero rapidamente o grupo de goberno, do PSdG, e mesmo o PP, se subiron ao barco para remar na mesma dirección, nunha agradable demostración de coherencia.

Máis de 500 persoas (xa había tempo que non se xuntaban tantos na volta a non ser por mor dunha festa…) concentráronse este xoves 26 de xuño ás portas do Xulgado corcubionés, ese que a nova Reforma da Xustiza que promove o goberno central quere eliminar. Coma tantos outros ao longo do país, deixando só un xulgado por provincia, alonxando así a Xustiza da cidadanía noutro paso atrás no afianzamento de dereitos.

O mítico alcalde corcubionés Rafael Mouzo foi unha das cabezas visibles dunha acción que pelexou dende a sombra Álex López. Pero tamén estiveron ben visibles, con menos nandeiras corporativas e máis pancartas informativas, o grupo de goberno de Corcubión, co alcalde Francisco Lema Chisco á cabeza, ou o grupo de PP con Luís Abelleira.

Boas novas, que por fin, despois máis dun ano en loita, a vila de Corcubión e parte da comarca de Fisterra se una para pelexar por un dos seus pulmóns.

Novas relacionadas

• Unha campaña por #CorcubiónPartidoXudicial.
• 29-04-14: O pleno de Corcubión, unánime polo Partido Xudicial.
• 28-04-14: Os alcaldes populares de Bergantiños confían en manter o Partido Xudicial en Carballo.
• 23-04-14: Carballo e Corcubión, sen Muros, lideran a loita contra o desmantelamento dos Partidos Xudiciais.
• 14-04-14: Gobernos e oposicións de Corcubión e Carballo érguense polos Partidos Xudiciais.
• 14-02-12: Muros tamén rexeita a supresión do seu partido xudicial.
• 11-05-12: Unanimidade en Corcubión contra o desmantelamento do Partido Xudicial.
• 09-05-12: Corcubión ameaza coa mobilización polo desmantelamento do Partido Xudicial.

Fonte

• Redacción de QPC ([email protected]).