Venres. 12.08.2022
El tiempo

O Mercado Medieval de Corcubión cumpliu 20 anos para cambiar de ciclo

Mercado Medieval Corcubion 2022
O Mercado Medieval de Corcubión cumpliu 20 anos para cambiar de ciclo

Tras dous anos de pandemia volvía unha das festas temáticas máis bonitas da Costa da Morte, e unha das feiras medievais máis auténticas do país. O XX Mercado Medieval Costa da Morte de Corcubión volveu vivir unha fin de semana intensa, completa, chea de xente de toda a comarca durante os 3 días. Un punto que ademais serve de punto de reencontro para tanta xente de toda a xeografía española que ten relación coa vila de San Marcos, e que cada ano aproveita o Mercado para volver ver ás súas amizades e familia.

A vila engalánase completamente e boa parte do pobo volve meterse no papel medieval e saca os seus disfraces gardados no arcón. É precisamente esa implicación da xente da vila o que lle dá ese sabor moito máis auténtico que, por exemplo, a Feira das Marabillas da Coruña, que este ano tamén coincidiu esta fin de semana. Non son xa aqueles tempos nos que o pobo era o protagonista do Desembarco, pero este ano si que volveron participar, tras dous divertidos días de ensaio, na singular representación teatra do Desembarco das tropas do Arzebispo de Santiago no 1.457.

Mercado Medieval Corcubion 2022 2

O venres arrincaba a troula con máis xente que nunca, tanto na praia de Quenxe para ver o Desembarco, como no propio mercado, que quedaba tamén cheo de vida. Estaba a rebentar o areal para ver esa loita artellada pola empresa Rivendel, sobre a que recae boa parte da organización.

O sábado e o domingo, a vila quedou algo baleira nas horas de sol, pois a xente buscaba praia, pero as noites foron como as de antes, de compritas (algunhas clavadas…), de kebabs, de demostracións, de actuacións, de pasarrúas gaiteiros… Un auténtico fervedoiro de vida.

Ferreiro Mercado Medieval Corcubion 2022

A organización

Organizacion Mercado Medieval Corcubion 2022
O equipo de organización do Mercado Medieval Corcubión

Era a décima edición que organizaba este grupo de voluntarios da Asociación Mercado Medieval. Outros 10 estiveran os Carlos Rey e compañía, polo que semella que os Piñeiro, Aquiles, Talo, Pana e demais xente desta organización van dar un paso a un lado.

Haberá que ver agora se hai relevo para este cambio de ciclo, que poida pelexar por convertir este evento en Festa de Interese Galego.

CRÓNICAS DOS MERCADOS

comentarios