Os bombeiros do parque Comarcal Provincial de Carballo foron alertados ás 19:40 horas de onte dun incendio que afectou a un vehículo ao carón dunha masa forestal en Montecelo, no concello de Coristanco. Á chegada dos bombeiros o vehículo atopábase calcinado polo que o operativo consistiu na extinción do lume que quedaba e previr a través do rego un valo anexo ao turismo e a zona pegada ao monte. Na incidencia non houbo que lamentar danos persoais.
Participaron tamén Garda Civil de Tráfico de Coruña e Protección Civil de Coristanco.

Desprendemento en Carballo

Ademais, esta mañá, pasadas as 7:00h, recibiron un aviso do desprendemento duns cascotes desde a fachada dun edificio situado en fronte dun supermercado, na rúa Perú, no casco urbano do concello de Carballo. O labor dos bombeiros consistiu na limpeza dos restos de lousa desprendidos. Na incidencia non se lamentaron danos persoais.
Participou tamén a Policía Local de Carballo.