A Xunta non creará nesta lexislatura o Parque Natural Monte Pindo

10:47 22/12/10

Boa nova era o feito de que o Observatorio Galego da Biodiversidade tratase a solicitude da declaración do Monte Pindo como Parque Natural, presentada pola asociación ecoloxista Adega. Pero malas son as novas que quedan trala devandita reunión. Malia que ningún dos especialistas do Observatorio descartou a posibilidade de promover a declaración, a Xunta enviou unha nota de prensa, mesmo antes de terse rematado a xuntanza, danco a entender que a Consellería MATI non tiña intención de promovela. Segundo ADEGA, a entidade que promove a declaración, "a nota de prensa foi enviada dende a Consellería cunha clara intención de enganar á poboación". A Xunta valora este complexo natural coma "un dos máis espectaculares da costa atlántica e integrado no Lugar de Importancia Comunitaria (LIC) Carnota-Monte Pindo, está incluído na Rede Natura 2000 e, polo tanto, na Rede Galega de Espazos Protexidos coa figura de Zona de Especial Protección dos Valores Naturais". Pero a Xunta conintúa cun seco "se ben este espazo goza de características singulares, non está na axenda desta lexislatura a súa declaración baixo a categoría de Parque Natural". Así, queda agora pendente presentar un informe completo para a vindeira reunión para estudiar se a de Parque Natural é a cataloación máis axeitada.

Outros temas tratado

Conservación das especies ameazadas

Na reunión revisáronse as liñas de traballo que se están desenvolvendo polo Departamento que dirixe Samuel Juárez para a conservación das especies ameazadas, en especial a elaboración dos plans de conservación, dos que na actualidade xa se conta con documentos de propostas técnicas elaborados para 46 especies. Porén, aínda deberán ser sometidos a procedementos de participación e información pública antes da súa aprobación como Decreto. Asemade, o Observatorio debateu a posible inclusión dunha nova especie no Catálogo: Cheilanthes guanchica. Trátase dun fento que en Galicia se atopa presente no límite sur do concello lugués de Sober, nunha zona de influencia mediterránea e que medra entre rochedos xistosos expostos ao sur nas costas cultivadas de viñedo que caen ao río Sil.

Erradicación de especies invasoras

O Observatorio tamén tratou a cración dun catálogo nacional con outras comunidades de especies exóticas invasoras, coa firme intención de erradicalas. Na actualidade, especies exóticas coma o visón americano, o cangrexo americano, a herba da pampa, a uña de gato ou Egeria densa xa están moi espalladas polo territorio, orixinando graves problemas de conservación para as especies ameazadas e ecosistemas, mentres que outras potenciais invasoras ameazan con entrar. Aos efectos, a Xunta está elaborando unha estratexia destinada á prevención e á xestión desta problemática, traballando xunto con outras comunidades autónomas e o Ministerio de Medio Ambiente e Medio Rural e Mariño (MARM) na elaboración dun Catálogo Nacional de Especies Exóticas Invasoras con fortes restricións en relación á utilización destas especies e obrigas destinadas á súa erradicación ou control.