Unidade de DNI de Carballo tramitando Un ano de traballo da Unidade de Estranxeiría e Documentación cumpre un ano de servizo en Carballo, que equivale 13.462 persoas que non tiveron que trasladarse a Santiago ou Coruña para renovar o seu carnet. Ese foi o número de carnés e pasaportes tramitados pola Unidade dende a súa apertura hai exactamente, hoxe martes 20 de marzo, un ano. Un servizo “tremendamente necesario”, como apunta o alcalde e como demostran tanto a excelente valoración da cidadanía como o número de documentos tramitados ao longo deste primeiro ano de actividade: 11.291 carnés de identidade, 827 deles expedidos por primeira vez, e 2.171 pasaportes Aínda que carballeses e bergantiñáns son os/as principais usuarios/as, a Unidade de Estranxería e Documentación de Carballo é xa un centro de referencia para os habitantes de toda a Costa da Morte, e mesmo ten prestado atención a cidadáns das catro provincias galegas e doutras comunidades, como Madrid ou Barcelona. Nos períodos vacacionais aumenta a demanda “debido –apuntan desde o servizo- aos cidadáns que residen no estranxeiro, principalmente en Suíza, e que aproveitan as vacacións para tramitar a documentación”. En moitos casos os carnés estaban caducados desde facía anos (aínda eran os antigos de cor azul), e o feito de dispoñer dunha oficina tan próxima facilita a súa renovación. Grazas a esta facilidade, o equipo ten recibido varias felicitacións por escrito.

Detidos

Á parte do traballo propio dunha unidade deste tipo, a presenza do servizo en Carballo permitiu tamén realizar outro traballo policial, como a detención de cinco persoas que acudiron á oficina para tramitar algún documento e sobre os que constaba unha requisitoria xudicial ou policial.

Como reservar cita

O equipo está formado por unha oficial de Policía, dous axentes e dúas funcionarias de corpos xerais, xa que a terceira vén de ser baixa por traslado, aínda que a súa vacante cubrirase en breve. A Unidade de Estranxeiría e Documentación de Carballo está aberta de luns a venres de 09.00 a 14.30 horas na planta baixa da Casa do Concello, con acceso directo desde a rúa Cervantes. Nese mesmo horario pode solicitarse cita de maneira presencial, aínda que tamén pode pedirse online a través da páxina www.citapreviadnie.es.

Novas relacionadas

• A unidade móbil do DNI volveu a Zas 10 anos despois.
• Calendario de visitas da Unidade Móbil do DNI aos Concellos da Costa da Morte.
• Decembro 17: 8.600 veciños de toda a Costa da Morte tramitaron o seu DNI dende Carballo.

  Fonte

• Redacción QPC (info@quepasanacosta.com)