O Mercado de Abastos de Santiago de Compostela, acollía onte lugar a presentación oficial da campaña “Meses con R, aposta segura”, cun evento organizado pola Asociación de Profesionais Turísticos de Costa da Morte (APTCM), que reuniu a unha variedade de personalidades do sector hostaleiro da Costa da Morte e representantes de diferentes administracións públicas.

A campaña "Meses con R, Aposta Segura", que conta co apoio da Consellería do Mar, Agader e Turismo de Galicia, ten como obxectivo promover a gastronomía local de quilómetro cero da Costa da Morte, durante as fins de semana dos meses de outubro, novembro e decembro. Os comensais poderán degustar menús ou pratos baseados na gastronomía local, principalmente peixes e mariscos das lonxas da Costa da Morte, así como produtos da horta. 

Esta iniciativa, promovida por APTCM e coa colaboración da CMAT, busca desestacionalizar a demanda, permitindo desfrutar dos produtos de temporada fóra dos meses do verán e destacando a riqueza dos produtos da Costa da Morte.

Os participantes

Os 18 establecementos participantes nesta campaña, que á súa vez busca fomentar a colaboración entre os sectores turístico e pesqueiro do territorio, son os seguintes:

• A Lonxa D´Álvaro
• A Marina de Camariñas
• As Garzas
• Asteria Beach
• Balarés Hotel
• Carrumeiro
• Liresca
• Mar da Morosa
• Mar de Queo
• Morada da Moa
• Náutico de Razo
• Mar de Preciosa
• Moncho
• Refuxio do Náufrago
• Parador Costa da Morte
• Pontemaceiras
• Río Sil
• Tira do Cordel

Algúns dos produtos nos que se basearán os menús inclúen o Grelo rizado, a Pataca de Coristanco, a Faba do marisco, o Pan de Carballo, o Berberecho do Anllóns, a Centola, o Polbo ou a inmensa variedade de peixes das lonxas da Costa da Morte.