Xoves. 24.09.2020
El tiempo

Balance positivo nesta primeira semana de confinamento

Alejandro Muíño, policía local de Muxía.
Alejandro Muíño, policía local de Muxía.
Balance positivo nesta primeira semana de confinamento

Hoxe cúmprese unha semana e media dende que se decretou o Estado de Alarma. Un decreto que levou ao confinamento da poboación e á adopción de diversas medidas especiais con tal de previr os contaxios. Algo que en xeral a maioría da xente da Costa comprendeu e acatou dende o primeiro momento segundo informan fontes de seguridade.

Concretamente en Muxía, Alejandro Muíño, da policía local, comenta que nun principio “pillounos a todos por sorpresa, tanto ás forzas de seguridade como á xente da rúa, pero a medida que foron a avanzando os días xa foi todo a mellor e podemos dicir que respectan as medidas bastante ben”.

Pola súa parte, Raquel Lema, Concelleira de turismo e cultura e Coordinadora de Protección Civil de Laxe, tamén coincide con esta premisa, pois a xente do pobo está a respectar non só a corentena, senón que tamén o fan coas medidas de prevención indo “só unha persoa, gandando a distancia de seguridade de como mínimo un metro e medio, levando guantes e mascarilla... E despois, a partir das oito cesa toda a actividade comercial. A verdade é que dende mañá a noite repectan moi ben as medidas e estou moi orgullosa dos veciños e veciñas”, indica Lema.

Raquel Lema nunha das compras a unha familia con necesidades especiais

Raquel Lema nunha das compras a unha familia con necesidades especiais.

Mais, como xa vimos, non todo o mundo está levando o Estado de Alarma da mesma maneira e xa foron algúns denunciados por non respectar as normas. Segundo Muíño e Lema, en sendos pobos son puntuais os casos nos que teñen que dar avisos á poboación. Aínda así, Muíño destaca que unha das cousas que máis lles chocou foi que a quen tiveron que dar máis avisos foi ás persoas de idade avanzada, que precisamente nestes momentos é un dos grupos de risco polo coronavirus.

Para Muíño, o maior problema que tiveron en Muxía foi coa praia de Nemiña, pois, cando se decretou o Estado de alarma colleu a todo o mundo desprevido. “Efectivamente había bastantes caravanas que estaban alí. Ben é certo que nun principio non se contaba con que saíse ao día seguinte a publicación do Boe co Estado de Alarma, esperábase que fora o luns. De todas formas, fomos alí a informar, a xente entendeuno ben e recolleron todo e marcharon sen problema. Despois, por se acaso, nos días posteriores para que non volvese a pasar o mesmo, o alcalde decretou o peche das praias para evitar este tipo de prácticas”, explica.

Pola contra, Lema indica que en Laxe máis ben sería o contrario. “Quizáis coido que a xente maior e os pequenos son os que máis se están adaptando á situación. Parece mentira que sexa así. Pero á xente maior vese moi concienciada, abrir a porta da casa cóstalles moito ás veces. Nós porque cando imos, sabemos que están na casa, senón... Quizais sexa por medo e porque igual tamén haberá xente que se aproveite desta circunstancia para aproveitarse da xente maior. Pero nós avisámoslles que teñan coidado e ante calquera dúbida que nos avisen a nós, á garda civil ou a policía local de Laxe”.

Mostras de agradecemento

Ambos corpos de seguridade levan dende o primeiro momento colaborando para a cidadanía. No caso de Laxe, Lema explica que están a colaborar con Asuntos Sociais no reparto de alimentos, na desinfección dos lugares públicos concorridos, axudaron na recolección de material para o Hospital Virxe da Xunqueira de Cee... Ao igual que Muxía, que na mañá do sábado conseguiu reunir 1000 traxes e 250 gafas para o centro hospitalario.

Unhas accións que se están vendo recompensadas con varias mostras de agradecemento por parte dos seus veciños. “A verdade é que a xente é bastante xenerosa nese aspecto, agradecen moito a atención ao sentirse tamén un pouco máis apoiados nese aspecto”, fala Lema sobre o pobo de Laxe.

Pola outra banda, en Muxía, puidéronse ver moi ben ese xestos de agradecemento co percorrido que fixeron os equipos de emerxencia por todo o pobo sendo aplaudido enormemente por todos os veciños dende as súas ventás, e que, como indica Muíño, “notouse”. Dito percorrido ten previsto repetirse todos os domingos ás 8 da tarde mentres dure a corentena.

Expectativas para as vindeiras semanas

Coa ampliación do Estado de Alarma, aínda nos quedan outras dúas semanas máis de confinamento por diante. Aínda que o balance destes primeiros días é bo, cómpre seguir mantendo a calma e intentar seguir as medidas de prevención da mellor maneira posible, respectando ademais a corentena.

Muíño, porén fai unha previsión non de todo boa. “Agora está todo moi fresco e todos quedamos na casa con gusto. Supoño que a medida que vaian pasando os días, isto psicolóxicamente afecta”. Algo, que segundo augura, pode derivar en problemas na vivenda e incluso “podemos falar de que por desgraza a violencia de xénero pode que aumente en moitos casos”.

Lema, pola súa parte, indica que “segundo fontes informativas do ministerio de interior, sei que quizáis esta semana e a principios da outra pode ser o punto máis álxido, pero seguiremos estando en corentena, seguiremos estando en contacto coa xente que ten necesidade e seguiremos controlando á xente nas rúas”.

comentarios