Como un Traballo de Fin de Master na Universidade de Santiago de Compostela nace este proxecto de Bateas de Luxo, creado pola xornalista carballesa Sheyla Bermúdez. Un completo repaso, a base de entrevistas, sobre o papel da Costa da Morte no narcotráfico durante as últimas décadas. Un traballo que ademais nos vai permitir facer un percorrido a través de QPC nas vindeiras datas.

​Sheyla Bermúdez, que acaba de rematar as prácticas na CRTVG, é a creadora do proxecto Bateas de Luxo

Bateas de Luxo é xa unha completa reportaxe audiovisual, que poderá chegar a ter forma de documental, que analiza pormenorizaradamente a incidencia do narcotráfico na nosa zona. A reportaxe fala do Clan dos Lulús e do Clan de Neaño, e fai unha guía polas grandes operacións policiais da última década.

Falan, por exemplo, en primeira persoa, o xornalista muxián da CRTVG Xusto Carril, ou o xornalista da Voz, Xosé Ameixeiras, contando as súas experiencias cos clans da comarca.

Pero tamén hai diferentes visións, dende o excomisario da UDYCO, Enrique León, ou o Xerente da Fundación Contra o Narcotráfico Fernando J. Alonso, que debullan como traballan os clans, pasando por un Sarxento do EDOA que dá pistas da actual situación.

Incide no asunto o escritor Víctor Méndez, autor dunha auténtica enciclopedia do tema, o libro "Narco Gallegos”.

Das consecuencias dá conta Carmen Avendaño, presidenta da Fundación Érguete e unha das heroínas que conseguiron cambiar a nivel social a imaxe de intocables dos narcos aló polos anos 80.

O experto Manuel Domínguez tamén analiza o proceso de branqueo de capitais. Os bingos (nomeadamente portugueses), os paraísos fiscais, grandes investimentos inmobiliarios, as lotarías, grandes entradamos empresariais… son algúns dos procesos máis utilizados.

Non falta a voz dun xuíz, como é Juan Carlos Carballal, que repasa como andan as condenas.

Por agora, poden pinchar en https://sheybermudez.wixsite.com/bateasdeluxo/ e descubrir todo o que foi sacando a luz a brava xornalista carballesa.

Novas relacionadas co Narcotráfico

• Decembro 2016: Aparece degolado un home en Fisterra relacionado co narcotráfico.
• Agosto 2016: O sarxento condenado.
• Xuño 2016: A descarga realizada en Arou devolve á Costa da Morte ao punto de mira do narcotráfico.
• Xaneiro 2015: Detidos 11 narcotraficantes implicados no tiroteo de Muxía.
• Agosto 2012: Droga, destino Costa da Morte.
• Xaneiro 2012: Tiroteo en Muxía.
• Xaneiro 2012: A droga agochada.
• Xaneiro 2009: A Costa da Morte, o novo porto de entrada da droga en Europa.
• Xaneiro 2009: Interceptan 4.000 kilos de cocaína que entraban por Muxía.