TeGa reclama o servizo de pediatría e de matrona para o centro de saúde de Coristanco

08:12 18/07/18

Durante os meses de xullo e agosto o centro de saúde de Coristanco non ofrece o servizo de pediatría O grupo Terra Galega de Coristanco - liderado por Amancio Lavandeira - vén de presentar unha moción para debatir no próximo pleno relativa ao servizo de pediatría que se está a prestar no centro de saúde de Coristanco e que ao igual que outras localidades da comarca (Zas, Malpica, Carballo,...) está afectado polos últimos recortes. Segundo expón TeGa, durante estes meses de xullo e agosto non haberá pediatra en Coristanco debido a que o titular da praza estará de vacacións e logo deberá cubrir unha substitución en Carballo. Isto implica que o usuarios e usuarias deste servizo deberán desprazarse a Carballo durante estes meses o cal, según TeGa, pode supoñer un serio probelema para nais e pais que non dispoñan de vehículo privado e que teñan usar o transporte público da zona coas súas limitacións. "Independentemente do problema de transporte, parécenos inaceptable esta situación xa que entendemos que a atención sanitaria infantil é un servizo prioritario e irrenunciable polo que os nenos e nenas de Coristanco deberían contar cun pediatra todo ano (as doenzas non collen vacacións)"; sinalan desde TeGa. Ademais, dende o grupo de Amancio Lavandeira critican que outros concellos da contorna - "cunha poboación sensiblemente inferior á do noso concello" - contan con pediatra e matrona todo o ano. Precisamente desde o ano pasado o centro de saúde de Coristanco carece do servizo de matrona. Estes son os principais motivos polos que o grupo TeGA quere instar á Consellería de Sanidade a tomar as medidas oportunas para que o servizo de pediatría do centro médico de Coristanco ofreza durante agora e nos vindeiros anos a atención dun pediatra e dunha matrona durante todo o ano.