Unha viaxe á historia do Bravú na Costa da Morte

Disco Rock na Costa da Morte 1992 — O Disco "Rock na Costa da Morte" foi un fito que precipitou o estoupido do Bravú

Unha viaxe á historia do Bravú na Costa da Morte

01:13 31/05/21

Corrían os primeiros anos 90 e Galicia vivía unha explosión de música contemporánea. As guitarras comezaban a chegar ás casas das aldeas e as rancheras da verbena comezaban a maridar cos temas de Siniestro Total ou os de Clash. A Costa da Morte non era allea e ducias de rapaces se puxeron a tocar nos galpóns.

De súpeto, como cogumelos, comezaron a agromar bandas que combinaban eses son cañeros co uso da lingua galega. O orgullo lingüísitico xa era, en si, un perfecto vínculo dende o que se podería artellar un movemento cultural. E coa necesidade de xuntarse e de crear a súa propia etiqueta, as bandas galegas crearon no 1994 o concepto do rock “Bravú”, do rock “sen capar”.

Foi no ano 94, precisamente o ano da primeira emisión do Xabarín Club na TVG, cando se creou esa etiqueta. Foi unha noite do 31 de outubro de 1994, a noite antes do II Castañazo Rock de Chantada, nunha bacanal de cocido e licor café, cando se asinou o chamado “manifesto de Viana” (pola Taberna chantaina onde se celebrada o banquete), co que se formaliza o concepto Bravú.

Nese banquete estaban Os Bocheciñas (A Coruña-Vigo-Potugal), Os Skornabois (VIlanova de Lourenzá e Mondoñedo), Os Papaqueixos (A Coruña), Os Diplomáticos de Monte Alto (A Coruña), Yellow Pixoliñas (Monforte), Vergalludos (A Coruña), O Caimán do Río Tea (Ponteareas) e os Rastreros (Chantada), e por suposto, Os Impresentables de Vimianzo.

Mentres o Xabarín Club (coas luces e sombras naqueles tempos xa que dende a TVG non se lle fixo caso a todas as bandas) encumbraba entre a mocidade a moitas destas bandas (aínda se oen os ecos do Xabarín coa creación dunha canle infantil e Xuvenil na TVG) comezaron a crearse proxectos comúns, como o que cristalizaba no disco “Unión Bravú” (1996) e na revista “Bravú” (1997).

Antes, en 1993, xa estaba nas tendas o vinilo “Rock Na Costa Da Morte”, o primeiro gran bombazo deste movemento na comarca despois de varios anos ofrecendo concertos e festas por toda a comarca. Un disco fraguado entre Cerceda e O Couto, gravado por Pablo Calleriza e Alejandro Casteleiro, que se financiou co concerto de presentación na Sala A Vieira (Ponteceso), onde tocaron todas as bandas e se conseguiron recaudar 800.000 pesetas.

O disco trae os seguintes temas:

Oscura es la vida (La Crema, de Carballo).
Por qué me tuvo que pasar (Desertores do Arado, de Cerceda).
Maruxa (Os Impresentables, de Vimianzo).
Cando algo funciona mal (Malavida, da Laracha).
Por la senda del sol (Troleblues, de Laxe).
O home bala (Zënzar, de Cerceda).
No teu rostro (Zënzar).
En cuarentena (Troleblues).
Un 9 de agosto (Malavida).
Enséñame a hacer el amor (Os Impresentables).
Hombres solitarios (Desertores do Arado).
Dark Lights (La Crema).

Pero son moitos máis as bandas que formaron parte desta onda musiqueira costeira, facendo grandes xestas en espazos como a Sala As Airas (Carballo), a Disco Canal 36 (Malpica), Pub Komic (Baio), O Hilton (Vimianzo), o Pub Túnel (Santa Comba), a Disco Enredos (Laxe)… ou en festivais como a Festa das Letras do Couto, ou o I Concerto Rock Costa da Morte celebrado en Laxe.

Aquí facemos unha colleita que esperamos nos axudedes a completar, para ademais ir debulando a historia de cada banda: