34 espectáculos no menú das vodas de prata FIOT

21:00 19/09/16

Presentábase a semana pasada en clave de humor. Esta semana xa temos o cartel completo da 25ª edición do Festival Internacional Outono de Teatro (FIOT) de Carballo. Nada menos que 34 espectáculos, coa comedia como protagonista, serán o menú desta especial edición das vodas de prata.

Os espectadores poderán ver catro estreas absolutas e oito estreas en Galicia na programación de sala, no OTNI e na Rúa dos Contos. Un dos pratos fortes é a estrea absoluta e coprodución do festival, “O Tolleito de Inishmaan” de Cándido Pazó, un moderno clásico universal, de gran éxito en todo o mundo, agora dirixido e adaptado polo Xograr do Outono Cándido Pazó e interpretado pola Xograr de Outono da edición de 2015, Susana Dans. A obra está coproducida polo FIOT. E á que lle toca abrir o telón e servir o aperitivo será á compañía madrileña Yllana, unha das máis veteranas sobre os escenarios de Carballo, que o 23 de setembro tamén conmemorará na capital de Bergantiños o seu 25 aniversario.

Ademais, diversas obras, entre elas unha estrea na nosa comunidade, homenaxearán a Cervantes e Shakespeare no IV Centenario do seu pasamento. E paralelamente mantéñense outras actividades que xa son un clásico no festival, como a “Escola do espectador” impartida por Camilo Franco, a sesión de entrevistas “Café con” e a proposta gastronómica “Dalle un bocado ao FIOT”.

De estrea en estrea

Entre as estreas absolutas tamén destaca “Dous homes e un vespino”. Despois de facer rir a media Galicia, os populares cómicos Xosé Touriñán e Pepo Suevos presentan o 15 de outubro o seu novo espectáculo para cumprir co mandamento principal desta edición: divertirse e sacar un sorriso ao público. O resto de estreas absolutas inclúense na programación da Rúa dos Contos, protagonizada polo Mago Álex co seu espectáculo “De ilusións tamén se vive” (1 de outubro) e Píscore con “Concerto singular” (7 de outubro). A presente edición será testemuña de numerosas estreas en Galicia. Ademais do prólogo de Yllana, a compañía valenciana L’Om Imprebís adentrarase na esencia do FIOT cun xogo escénico, de luces e telóns con “La Crazy Class” (16 de outubro). Por primeira vez tamén chega a Galicia a obra “La estupidez” (29 de outubro), da compañía Feelgood Teatro, unha hilarante road-movie interpretada por coñecidos rostros do panamorama televisivo como Fran Perea e Toni Acosta. A sesión dobre do 8 de outubro tamén contará coa estrea en Galicia de “Hey Bro! Hipstershow!”, do célebre comediante Rafael Maza (Fabiolo). A VII edición do ciclo OTNI unha dobre ración de estreas, cos espectáculos “Micro-Shakespeare” (21 de outubro) de Laitrum Teatre e “Penev” (27 de outubro) de La Teta Clava Producciones.

Shakespeare e Cervantes

As estreas en Galicia tamén mergúllanse na celebración do IV Centenario da morte de Cervantes e Shakespeare, que é un dos elementos principais desta 25ª edición. Este é caso da estrea na nosa comunidade de “Sueño de una noche de verano” (22 de outubro), de Metatarso Producciones. As referencias aos mundos de Cervantes, como é o caso de “Rinconete y Cortadillo” (9 de outubro), de Sexpeare Teatro e a “Cervantina” (23 de outubro), versións e diversións sobre textos do autor español da man dunha das compañías máis aclamadas polo público de Carballo, Ron Lalá, que leva a cabo esta produción en coordinación coa Compañía Nacional de Teatro Clásico.

Actividades do Fiotiño

Os máis pequenos sempre teñen un oco no festival no marco das actividades do Fiotiño. Volve a “Noite branca no teatro” os días 24 e 25 de setembro. Os nenos poden divertirse mentras aprenden a ser xornalistas no “Pequeperiodistas”, unha actividade na que poderán entrevistar aos actores que veñen ao festival. Unha das novidades é “Time Lapse”, obradoiro para os fioteiros a partir de seis anos no que se realizará unha montaxe audiovisual onde nenos e adultos interactuarán bailando, interpretando e cantando. Na rúa poderase gozar dos espectáculos “Ritmo refugallo” (30 de setembro) do Trío Refugallo e “Tripula” (1 de outubro) dos Farrés Brothers. E, coma sempre, un veterano: o Concurso Escolar de Teatro Lido Xosé Manuel Eirís, que reparte premios por valor de 850 euros.

Xograr de Outono

No seu 25ª aniversario, o FIOT quere entregar o Xograr do Outono a un dos actores que participou na primeira edición do festival e que é unha das figuras que iniciou o teatro alternativo, de compromiso e experimentación en Galicia. Trátase do Premio Nacional de Teatro Miguel de Lira, quen recollerá o seu galardón o 21 de outubro, unha vez que se baixe do escenario despois da representación de “Eroski Paraíso”.

Venda dos bonos e entradas soltas

Os abonos e entradas soltas poderán adquirirse este ano a través da plataforma Ticketea.com, co obxectivo de mellorar o servizo e aforrar custes ao espectador. Tamén se poderán mercar no teléfono 902 044 226, así como na web e na páxina de Facebook do festival. Tamén existe a opción de comprar as entradas os días de representación na billeteira do Mercado Municipal 90 minutos antes do inicio da función. Como outros anos, para asistir aos espectáculos poden adquirirse os bonos, que custa 75 euros para asistir a todas as representacións do auditorio (70 euros reducida). As entradas soltas varían en función da obra e van dos 7 aos 15 euros. O público en xeral poderá comprar os bonos a partir do 23 de setembro, mentras que os socios da Asociación Cultural Telón e Aparte deberán facelo entre o 19 e o 23 deste mes por vía telefónica. As entradas para os espectáculos da Rúa dos Contos estarán dispoñibles a partir do 23 de setembro nos locais nos que se representarán.