A Fundación Fernando Blanco ten tamén o seu mecenas

08:10 21/03/14

Julio Lopez con Dario Areas e un traballador de Bazarra

As Becas manteñen vivo o legado do mecenas Fernando Blanco, pero a Fundación tamén ten o seu mecenas para facer esa labor.
Na mañán do mércores 19 de marzo asinouse o terceiro convenio de colaboración entre a Estación de Servizo Bazarra e a Fundación Fernando Blanco de Lema.
Julio César López Vázquez, Xerente da E. S. Bazarra, e Darío Areas Domínguez, Secretario da Fundación, foron os encargados de plasmar as súas rúbricas no mencionado convenio, polo que a empresa ceense colaborará económicamente en tres das actividades programadas pola Fundación para este ano 2014.

3 actividades apoiadas

En concreto, as actividades encadradas neste convenio son:

II Concurso de Relatos Curtos e I Concurso de Debuxos: Ambos concursos están dirixidos a escolares dende 1º Ciclo de Primaria á ESO dos centros educativos de 10 concellos da contorna. O Concurso de Relatos xirará en torno ó tema “As escolas dos nosos maiores”, e o de Debuxos terá como título “Un día na escola”. En ámbolos dous certames entregaranse un total de 15 premios valorados en 915 €. A Estación de Servizo Bazarra comparte colaboración nesta actividade coa Deputación Provincial da Coruña.
3ª Edición das Becas-Premio Fernando Blanco correspondentes ó curso 2013-2014. Estas Becas-Premio teñen por obxecto premiar a 5 dos mellores expedientes académicos do IES Fernando Blanco de Cee, en concreto ós cursos de 1º PCPI, 3º ESO, 1º Bacharelato, 1º Ciclo Medio e 1º de Ciclo Superior, e que o ano pasado contaron coa presenza do Conselleiro de Cultura e Educación, D. Xesús Vázquez Abad. Tamén nesta actividade a E. S. Bazarra compartirá colaboración coa Deputación da Coruña e con varios establecementos de Cee.
Programa Cultural “O Mes da Fundación”. Celebrarase no mes de outubro cunha dobre programación. Por un lado actividades para todos os centros educativos de Cee e, por outro, actividades para o público en xeral. O ano pasado este programa cultural contou coa participación de figuras tan destacadas coma Jorge Mira, Ángel Carracedo, Xosé Neira Vilas, Concha Blanco, Fernando Fraga, etc.

Dende a Fundación Fernando Blanco de Lema queren agradecer a "colaboración altruista e desinteresada da Estación de Servizo Bazarra, personificándoa na figura do seu xerente, Julio César López, un home fortemente comprometido coa cultura e o deporte do noso pobo".