Que mellor xeito de coñecer o mar que facelo directamente na Lonxa. Así o viviron uns 50 maiores do Concello de Boqueixón, que a través do programa Mar Achega, promocionado pola Consellería do Mar e desenvolto por Altega, viñeron a pasar un día á vila mariñeira de Fisterra. E ben que lles cundíu pois todos valoraban moi positivamente a visita que recomendarían a outros veciños ao chegaren.

A visita comezou no Museo do Castelo de San Carlos, cunha espectacular sesión por parte de Alexandre Nerium. O poeta fisterrán consegue que a historia se mesture coas lendas facendo viaxar aos visitantes polos tesouros submariños das augas de Fisterra. Ademais puideron descubrir métodos antigos de pesca como a "raña", lugares emblemáticos como a "ribeira das canas". Ademais dos naufraxios que dan nome a Costa da Morte, os visitantes chegados do interior coñeceron tamén o uso do "corno da néboa", os traballos de reparación de aparellos que fan os mariñeiros nos seus "choios" no edificio da lonxa.

Tras un interesante paseo ata a Praia Corveira, os visitantes entran na lonxa. Os cociñeiros María Josefa Insua Canosa e Francisco Insua Fernández, do restaurante O Fragón de Fisterra, foron os encargados de achegarlles o sabor do mar. Experimentados xa nesta clase de eventos públicos (o mesmo fixeran no Forum Gastronomic de Girona o pasado febreiro) explicáronlle a importancia de consumir peixe de temporada, sempre produtos etiquetados, e a poder ser galegos. Completamos cunha boa maridaxe, en forma, neste caso de viño tinto galego, para sorpresa dos comensais. Pementos de herbón, abadexo, longueirón, e queixo con mel, formaron un delicioso menú.

Tralo xantar, e na propia instalación da lonxa, os visitantes coruñeses asistiron aos preparativos da poxa que comeza cada día as 16:45 horas. Toda unha experiencia mariñeira en primeira persoa.

Novas relacionadas

• A Pataca Fina de Carballo vaise cocendo a lume lento.
• A Costa móntase na moda dos Gin Tonics.
• Entrevista con Manuel Gago: “O litoral da Costa ten propiedades hipnóticas”.
• A denominación de orixe da Costa da Morte triunfa no Forum Gastronomic de Girona.
• Xornalistas especializados de toda a península coñecen os tesouros da Costa.

Fonte

• Redacción de QPC ([email protected]).