Dosis Letal, un grupo de rock de rapaces de 15 anos dende a fin da terra ao estrelato
O pasado día 16 de febreiro, o Mercado Cultural de Fisterra descubríu unha das bandas emerxentes con máis futuro da comarca. Ante máis de 200 persoas, e despois das actuacións da fisterrá Julia (outra estrela no horizonte costeiro, canteira da ESMU de Carnota) os rapaces da banda de rock da fin da terra “Dosis Letal” saltaron ao escenario a rasgar as súas guitarras. Non se asusten, o nome é unha homenaxe á primeira banda de Robe Iniesta, o líder de Extremoduro falecido o ano pasado. Eles son Eric, natural de Corcubión e alumno do IES Fernando Blanco; e os fisterráns do IES Fin do Camiño Brais, Andrea e Íker.
A potencia da presentación fíxose palpable dende o inicio, cunha actuación maxistral por parte do batería Brais que demostrou as horas de ensaio que leva practicado no garaxe da súa casa e no renacido Local de Ensaio de Corcubión, e que a pesar de ter 14 anos, xa parece un virtouso como Taylor Hawkins.
Outro aspecto destacable foi a forte personalidade no escenario de Andrea, o líder da banda, vocalista, guitarrista e gran fan do rock español dos anos 80, algo raro para un mozo do século XXI, que desprega unha enerxía contaxiosa e que fixo tremer o local coa súa potencia musical. A xente que acudiu saiu electrizada.
Eric semella DeeDee Ramone e coa súa guitarra é o perfecto mestre que dá equilibrio, guitarra rítmica de moitos quilates, ao igual que Iker co seu baixo.
Unha grande descoberta para o panorama musical da Costa da Morte.
