Preferente: Dous cara arriba e dous cara abaixo

Deportes Cee Dumbría Ponteceso Costa da Morte Fútbol da Costa

Preferente: Dous cara arriba e dous cara abaixo

08:15 06/02/12

Diferentes as liñas dos equipos costeiros na Preferente logo desta xornada 22. Se ben o Soneira e o Xallas seguen nunha liña ascendente, Santa Comba e Dumbría levan varias xornadas complicándose a vida. Máis grave é a situación do Santa Comba, que pasou de ser aquel Barça galego aló por novembro ao sen confianza que é a día de hoxe. Onte non podía co Ribadeo, ou máis ben co seu terreo de xogo, que se parecía máis a unha leira de patacas que a un pasto de vacas, algo contra o que os de Gelucho non puideron loitar. Polo demais, o Soneira sacaba un puntiño do complicado campo de Laracha que lle sae caro en forma de lesións; o Xallas vencía con claridade ao pechacancelas cunha gran segunda metade; e o Dumbría caía ante o Chantada nunha segunda metade chea de despropósitos.

Ribadeo - Santa Comba (3-1)

SANTA COMBA: Diego, Agustín (Óscar, min.68), Roberto, Angelo, Gonzalo, Jota (Chinda, min,66), Doro, Toni, Noli (David, min.80), Julián e Baña.
Goles: 1-0, min.15: tras un control de Roberto que esvarou e deixou morto para o dianteiro; 1-1, min.55: Pablo Baña de cabeza a centro de Julián; 2-1, min.65. 3-1, min.75.

Non levanta cabeza o cadro laranxa, que neste 2012 segue sen sumar. Desta volta, e malia enfrontarse a un dos de abaixo, o campo perxudicou moito aos de Gelucho, que sempre buscan o xogo combinativo. Desta volta foi un encontro de brega e de segundas xogadas, e non puideron sacar nada positivo malia que tiveron boas ocasións e algunha que outra xogada trenzada. Como a do gol de Pablo Baña de cabeza que chegaba tras unha boa xogada por banda. Pero en defensa o equipo non estivo fino e os dous primeiros goles chegaron por agasallos dos laranxas. Así e todo, o Santa Comba tivo durante moitos minutos contra as cordas aos locais, pero non mataron o partido e, á contra, os da Mariña asinaron dous tantos que quitaron as forzas dos xalleiros.

Laracha - Soneira (2-2)

SONEIRA: Fran (Pose, min.46), Ferreiro, Mayor, Martín, Vecino, Santi, Iago (Richi, min.89), Míchel, Javi (Mauro, min.60), Víctor García e Vía Rápida (Marcos Curra, min.80).
Goles: 0-1, min.1: Vía Rápida; 0-2, min.30: Javi; 1-2, min.55; 2-2, min.75.
Lesións: Fran no xeonllo, e Víctor García no xeonllo, Javi e Vecino acabaron coxeando.

Saíulle caro o punto aos de Miguel, que volven con 4 lesionados de Laracha. O conxunto soneirán púñase pronto por diante cun bo tanto de Vía Rápida e outro de Javi á media hora. Pero na segunda o equipo acusou as baixas de Fran, na portería, e de Víctor García e Javi no centro do campo. Quedaba o equipo algo descompensado cos xuvenís Richi, Mayor e Marcos Curra sobre o céspede e con Víctor Vecino tocado coxeando polo campo ao non teren máis cambios. Aproveitou aí o cadro larachés para empatar e a piques estivo de levar todo o premio.

Xallas- Foz (3-0)

XALLAS: David, Ismael, Álvaro, Becerra, Brais, Ricardo (Elvis, min.82), Rubén, Adrián Prol (Toni, min.46), Adrián Beiroa e Luís.
Goles: 1-0, min.57: Adrián Beiroa; 2-0, min.80: Toni; 3-0, min.84: Elvis.
Lesión: Prol con problemas no xeonllo.

Novo gran partido dos de Iván Cancela que están a realizar unha campaña exemplar. E iso que saíron algo relaxados ante o pechacancelas, e se viron superados na primeira metade por un Foz moi voluntarioso. Pero tralo descanso, e trala bronca de Iván Cancela, espabilaron os verdes e sacaron todo o seu potenciar. Ademais o equipo recuperaba unha peza fundamental, o fisterrán Toni que voltaba aos campos, e revolucionaba o partido. Adrián Beiroa asinaba o primeiro, e o cadro xalleiro non sentenciaba ata que Toni marcaba o segundo a 10 para o final. Outra boa nova foi o debut de Elvis, procedente do Negreira B, mediocentro fichado para este treito final de campaña, que ademais, marcaba o terceiro.

Dumbría - Chantada (1-3)

DUMBRÍA: Juan Purrúa, Tantán, Iván Pequeño (Isma, min.46), Suso, Aarón Fdez., Aarón López (Sergio, min.80), Adrián Mackaay (Schuster, min.46), Piri, Iago, Eloy (Toni, min.60) e Luisito (Cacho, min.70).
Goles: 0-1, min.30; 0-2, min.80: de penalti; 0-3, min.82; 1-3, min.89: Iago de penalti.
Expulsión: o meta Juan Purrúa, min.80.
Lesión: Adrián Mackaay con problemas nas costas.

Unha segunda metade para esquencer deu ao traste cunha boa primeira metade dos dumbrieses. I é que durante os primeiros 45 minutos, Eloy mandaba ao longueiro e Adrián Mackaay tiña dúas boas ocasións para empatar tralo gol inicial dos visitantes. Iago tamén puido marcar e o partido marchou ao descanso cun 0-1 cando o marcador podería ter sido de 4-1 tranquilamente. Na segunda, e co Chantada metido atrás, o Dumbría non xogou ben. Erros defensivos, malas combinacións, fallos clamorosos arriba e agasallos atrás deron ao traste co partido. Ademais, e cando máis apretaban, Juan Purrúa era expulsado tras un penalti que significaba a sentencia.