Domingo. 21.07.2019
El tiempo

O BNG presentou unha batería de enmendas ao Fondo Europeo Marítimo Pesqueiro

O BNG presentou unha batería de enmendas ao Fondo Europeo Marítimo Pesqueiro
Ana Miranda en Bruxelas coa expedicion da pesca artesanal galega Ana Miranda en Bruxelas coa expedición da pesca artesanal galega-Foto-Fani Alonso-13 Nudos

Despois da visita dunha expedición da pesca artesanal galega a Bruxelas, e despois de que a Comisión Europea de Pesca tomase boa nota das demandas do sector, a eurodeputada do BNG, Ana Miranda, vén de presentar unha batería de emendas ao Fondo Europeo Marítimo Pesqueiro (FEMP).

Son enmendas, xusto cando remata o prazo (e sen que o goberno galego se puxese en contacto coas eurodeputadas membros da Comisión de Pesca), para reclamar un aumento do orzamento dos fondos (de 6.140.000.000€ a 6.400.000.000€), que beneficiaria a toda a frota galega, fronte á baixada proposta polo documento presentado pola Comisión Europea.

Definición real de “pesca artesanal”

A visita, como recoñecen varios membros da expedición, serviu para que os responsables coñezan a realidade da pesca artesanal, e comproben que nada ten que ver, en materia de sostibilidade, a pesca artesanal coa industrial. Así, pediron unha definición máis ampla de pesca artesanal que a manexada até agora (que só ten en conta a medida, de 12 metros de eslora), de forma que recolla as especificidades do sector galego.

Importancia social do sector

Miranda lembroulle á Comisión que “o sector da baixura presenta case o 75%  das embarcacións pesqueiras rexistradas na Unión Europea e case a metade dos postos de traballo do sector da pesca, porcentaxe igualmente alto no noso país e cunha enorme importancia social, económica e cultural tanto na pesca extractiva como no marisqueo. En consecuencia, Ana Miranda considera indispensable a creación dun “Programa específico para a Pesca Costeira Artesanal” que, ademais de contemplar estes criterios, inclúa medidas concretas para mellorar a saúde, a seguridade e as condicións de traballo tanto a bordo dos buques de pesca como en terra”.

Por iso incluíron unha enmenda para que se exclúa á pesca artesanal do sistema de TACs e cotas tan prexudiciais para o sector. Ademais, Ana Miranda pediu que se aumente o apoio ás mulleres no sector pesqueiro, xa que no marisqueo, redeiras, conserveiras e prazas de peixe, entre outros ámbitos, son a maioría e con enormes dificultades laborais.

Auga limpa para pescar e marisquear

Outra das enmendas vai dirixida á “coordinación da política de pesca comunitaria coa política medio ambiental, en particular coa relativa á protección de augas do mar e do litoral pois facendo referencias ás problemáticas en rías como a do Burgo ou a de Corcubión, que deixaron de ser grandes bancos produtores por mor da contaminación.

Axudas reais

Ademais, o Bloque reclama subvencións para a innovación, así como para os casos de paralización temporal por vedas, temporais, accidentes na costa e mareas negras. Ao respecto sinala que deben considerar 15 dias sen actividade e perda de ingresos dun 30% dun ano antes, non 120 dias e 3 anos de valoración como pretende a Comisión Europea pois “con ese criterio moita frota galega que marea menos de 3 meses ficaría sen axudas”. Nos dous casos, Miranda reclama “menos burocracia” na súa tramitación, xa que até co procedemento actual o sector quéixase da súa complexidade. “Xa bastante ten o sector con sobrevivir, pois moitas mariscadoras non chegan a 400 euros”, denuncia a eurodeputada nacionalista.

Ademais, o BNG solicita que se apoie ás marcas de Denominación de Orixe como o mexilón de Galicia, e que se diferencie entre a acuicultura industrial da artesanal, en relación ás respectuosas bateas de mexillóns de Galicia.

Novas relacionadas

https://quepasanacosta.gal/europa-escoitou-pesca-artesanal-galicia/ https://quepasanacosta.gal/queremos-que-europa-trate-dun-xeito-diferenciado-a-pesca-artesanal-deixandonos-fora-do-tacs-e-as-cotas/

Comentarios