Cada novembro, a Costa da Morte ten unha emotiva cita co seu pasado. A historia do Serpent é un dos mellores exemplos de como os naufraxios marcaron a nosa idiosincrasia. E non queremos, nin podemos, esquecelo, pois sérvenos para lembrar así a todos os mortos do mar... Aquela noite do 10 de novembro de 1890, o buque británico afundía nas bravas augas contra as rochas Punta do Boi, no Cabo Vilán. O mar vomitou os 172 corpos dos falecidos dende a noite do naufraxio ata o nadal do mesmo ano. Ante o mal estado no que se atoparon os corpos era habitual soterralos moi preto da costa e facelo nunha fosa común para ser rodeada de muros e a construción do cubículo interior. E alí estiveron os veciños de Camariñas, erguendo o cemiterio e axudando nos coidados dos superviventes, o que foi recompensado polo almirantazgo inglés.

Sentida homenaxe

Imaxe da Homenaxe ao Serpent no 2013-Foto-Jose Manuel Pato Por iso, dende o 2008, Camariñas rende unha sentida homenaxe no mesmo Cemiterio dos Ingleses, un lugar que simboliza á perfección a esencia da Costa da Morte, polo seu significado e polo seu salvaxe emprezamento. Un lugar de culto para milleiros de visitantes británicos e europeos, que pouco a pouco foise facendo un oco nos corazóns dos veciños costeiros. Máis aínda neste 2015, pois celébrase o 125 aniversario do seu afundimento con varias novidades. E por iso, o Cemiterio acollerá unha homenaxe especial. O martes 10 de novembro, ás 21:30h, teremos unha Noite de Naufraxios no propio cemiterio. Arrincará a sesión cos habituais discursos de Rafael Lema (Delegado na Costa da Morte da RLNE), Juan Campos (escritor de Náufragos de antaño e membro da RLNE), Xosé María Lema (Historiador do Seminario de Estudos Comarcais), José Manuel Pato (Delegado en Galicia da Real Liga Nalva Española), Paul Lemkes (Agregado de Defensa da Embaixada Británica), unha das novidades deste ano, e Manuel Valeriano Alonso de León (Alcalde do Concello de Camariñas). Deseguido terá lugar a representación de catro escenas teatrais que lembran os náufragos do Serpent, City of Agra, Trinacria e os buzos dos barcos de Salvamento Marítimo de Camelle. A noite será pechada coa entrega floral e cun espectáculo pirotécnico que consistirá no lanzamento de 21 salvas, para que todos os veciños da volta vivan o loito tamén dende as súas casas.

Máis actividades no propio Cemiterio

Durante toda a semana proxectarase no Faro Vilán o documental "Faros da Costa da Morte" (2010), dirixido e narrado por Manuel Vilar, de 16 minutos de dirección e subtitulado en castelán. Neste documental, con preciosas imaxes aéreas, dedícanse moitos minutos ao faro Vilán e mesmo se fai unha demostración gráfica de como se produciría ese foco luminoso por medio dun arco eléctrico entre dous carbóns. Ademais, sábado 14 de novembro, a partir das 21:00h, volve o teatro ao Cemiterio cunha Actuación baixo o nome "Noite dos naufraxios", unha actuación dun grupo de gaitas, e o disparo de 21 salvas.

Novas relacionadas

• A embaixada Británica felicita aos organizadores do acto de homenaxe ao Serpent.
• Investigadores europeos destacan a riqueza dos pecios da Costa da Morte.
• Homenaxe ao Serpent 2014: A Costa da Morte non esquece o Serpent.
• Homenaxe ao Serpent 2013: Camariñas entregou as Flores da Memoria aos náufragos do Serpent.
• Homenaxe ao Serpent 2012: Violíns nocturnos para homenaxear o naufraxio do Serpent.
• Homenaxe ao Serpent 2011: Unha homenaxe ao Serpent desafiando o temporal.
• Homenaxe ao Serpent 2010: Unha ollada dende dentro á homenaxe polo 120 aniversario do Serpent .
• Homenaxe ao Serpent 2010: A conmovedora homenaxe ao Serpent xa é unha referencia na Costa da Morte.
• Homenaxe ao Serpent 2009: Sembrando os cimentos dunha homenaxe aos mortos do mar.
• Homenaxe ao Serpent 2008: O Cemiterio dos Ingleses acolleu unha romántica homenaxe aos mortos do mar.

Fonte

• Redacción de QPC ([email protected]).