Xa é un dos grandes reclamos gastronómicos da Costa da Morte. E a súa cita de marzo só serve para refrendalo. Esta fin de semana tivo lugar unha nova edición, a XXI, Festa do Bolo do Pote de Mazaricos. Aí estiveron, sen tregua, xentes da Asociación Monte Picoto e da Asociación de Amas de Casa de Mazaricos, para dar de comer a máis das 2.000 persoas que quixeron comer quente e rico para superar a friaxe.

“Non podería concretar, pero a cola era inmensa, houbo xente que tivo que agardar ata media hora para ter a súa ración”, declarou Laura Prado, a presidenta das Amas de Casa. Gaiteiros e unha charanga foron os encargados de poñer o toque de música ao ambiente, mentres os Minis da Miniquedada completaba a escena dun xeito máis que auténtico.

Ademais da popular xornada dominical, celebrada na carpa, a fin de semana foi completa, pois ata 9 establecimentos serviron menús do Bolo do Pote. O presidente da Asociación de Hostaleiros, Jorge Jurjo tamén sinalou o “éxito” da convocatoria para os locais hostaleiros da vila que non pararon a súa actividade ata ben entrada a tarde.

Novas relacionadas

• 2019: O bolo do pote, un dos produtos estrelas da Costa da Morte no Xantar.
• Bolo do Pote 2018: Máis xente que nunca para zampar as 2.000 racións da Festa do Bolo do Pote.
• 2018: O bolo do pote de Mazaricos traspasa a fronteira a idade.
• Bolo do Pote 2017: A tradición e a troula mesturáronse na Festa do Bolo do Pote de Mazaricos.
• Bolo do Pote 2016: 2000 racións de tradición gastronómica na Festa do Bolo do Pote de Mazaricos.