Luns. 26.02.2024
El tiempo

Entrevista ao actor esteirán Xosé M. Olveira "Pico"

Entrevista ao actor esteirán Xosé M. Olveira "Pico"

Traemos hoxe esta entrevista do recén colaborador desta casa, o esteirán Francisco J. Portela, cun veciño seu, Xosé M. Olveira "Pico".

Entrevista a Xosé M. Olveira "Pico" de Francisco J. Portela

Teño o pracer de entrevistar a un paisano. Un paisano que o é por partida dobre: por ser galego e por ser esteirán. Aí queda iso. Quen me ía dicir a min que tería o pracer de concertar unha interviú co expresidente da Academia Galega do Audiovisual e dúas veces laureado co premio Mestre Mateo a mellor interpretación masculina (de reparto) en dúas longametraxes: "Os mortos van as présas" e "Retornos". E sen esquecernos da súa faceta como actor teatral, mundo no que leva dende o ano 1972, se non me equivoco. É un todoterreo da escea, tanto do mundo da farándula coma da pequena e da grande pantalla.

  • 1. Moi boas, “Pico”. ¿Cómo te atopas?. Dígoo polo traballo que todo xunto leva consigo: Director de un organismo coma AVG e sin olvidarnos da túa faceta como actor.
Ola, Paco, imos indo, moitas grazas. Tamén é certo que xa o agobio non é tanto, posto que desde o mes de maio xa non presido a Academia Galega do Audiovisual. Este posto renóvase cada dous anos e este ano xa non presentei candidatura porque como ti ben pensas, supón unha carga de traballo considerable que non é asumible durante un período moi prolongado.
  • 2. Parece que o mundo audiovisual en Galicia goza de boa saúde.
Pois goza, si. Lévanse a cabo proxectos moi interesantes a pesares de que cada vez se conta con menos orzamento. Contamos cuns profesionais moi competentes e non só no tocante á parte interpretativa senón tamén con técnicos, guionistas, produtores e directores que están altamente cualificados e o máis ilusionante de todo é que todos nós temos unha gran capacidade de implicación nos proxectos aínda que moitas veces case non saia a conta.
  • 3. O filme “Sempre Xonxa”, de Chano Piñeiro, ¿marcou o punto de inflexión das longametraxes en galego?. Xa de por si o reparto é de luxo.
É certo que ese ano supuxo un punto de inflexión porque ademais de “Sempre Xonxa”, estrearonse dúas longametraxes máis, “Urxa” e “Continental”, cousa impensable naqueles anos.
  • 4. A animación galega é un referente no panorama cinematográfico español. Véñenme a memoria, por exemplo, Donkey Xote, O Apóstolo. Hai bos profesionais neste ámbito pero tamén faltan necesidades, ¿non?.
Faltan apoios, pero é certo que as producións de animación galegas son un referente no resto de estado español e tamén en Europa.
  • 5. E as series que emite a TVG parece que son un bó trampolín para os actores galegos. Aí témolo salto de actores coma Luis Tosar, Pedro Alonso, ti mesmo,... que estades tendo o voso éxito na pequena e a grande pantalla nacional.
Si, a televisión é un medio que dá moita popularidade. Hai algúns actores que, efectivamente, se deron a coñecer para directores do ámbito estatal desde este medio.
  • 6. ¿Qué teñen as series galegas que tan ben se fala de elas, incluso fora das fronteiras de Galicia?.
Pois que están moi ben feitas, cuns guións moi ben estruturados, e uns equipos de profesionais moi cualificados, a pesares do axustado do orzamento.
  • 7. E falando de Pratos Combinados: unha serie que nos fixo pasar ratos agradables a moitos galegos. ¿Botas de menos a Pedro Barreiro, ese avogado viuvo sempre pendente dos seus fillos?.
Non, pero lémbroo con moita tenrura.
  • 8. Un mundo de historias, Mareas Vivas ou Pratos Combinados son series nas que tiveches un papel destacado. Papeles distintos e series distintas. ¿Costa traballo olvidarse de Pedro Barreiro, por exemplo, e meterse no do párroco don Amancio?.
Non, niso consiste o traballo do actor. É mais, eu persoalmente, agradezo moito os cambios de rexistro, interpretar personaxes totalmente diferentes.
  • 9. E non digamos o teu currículum no mundo do cine, tanto en galego coma en castelán. Directores coma Chano Piñeiro, Manuel Gutiérrez Aragón, Sancho Gracia ou o mesmo Alejandro Amenábar. Traballar con actores coma Luis Tosar, Javier Bardem, Belén Rueda. ¿Con cal director te sentiches máis a gusto?. ¿Tes algunha anécdota con calqueira deles ou cos actores que nos poidas contar?.
A gusto sentinme con todos pero con Luis Avilés, Jorge Coira e Alfonso Zarauza estou moi cómodo. Por razóns obvias, teño sempre un recordo especial de todo o vivido con Chano.
  • 10. Non me esquenzo do teatro, pois levas neste mundo dende o ano 72, que xa choveu. Grupos coma Ditea, CDG, etc.. Agora estás de xira por Galicia cunha comedia. ¿é certo?.
Pois si, estamos coa xira de O FLORIDO PÉNSIL, de Andrés Sopeña, coa compañía eme2, dirixida por Fernando Bernués e Mireia Gabilondo. É unha crítica, en clave de humor, á absurda e ilóxica brutalidade do sistema educativo que dominou a España da posguerra. Está sendo moi ben recibida polo público e pola crítica. Por se tes interese póñoche a ligazón da páxina do espectáculo no facebook O Florido Pensil.
  • 11. E onde te atopas millor, ¿actuando en directo cara o publico nas salas de teatro, ou rodando series ou longametraxes?
Sen dúbida ningunha, cara ao publico, a maxia do teatro non se pode substituír por nada.
  • 12. O 22 de decembro celébrase o aniversario do nacemento de Álvaro Cunqueiro. ¿Qué opinión che merece este escritor galego?.
É un dos mellores escritores do século pasado.
  • 13. E nada menos que ti o celebras coma protagonista da película Sinbad. Un bó papel para despedir o ano.
Foi moi bonito darlle vida, novamente, a Sinbad, posto que este personaxe xa o interpretei en teatro en 1999, dirixido por Quico Cadaval, co Centro Dramático Galego.
  • 14. Moitas grazas por concederme esta entrevista e os meus mellores desexos para o ano que ven. Que che siga sorrindo o éxito.
De nada. O mesmo desexo eu para ti.

Máis información

Novas relacionadas

Fonte

Comentarios