Este mércores 4 de decembro o Concello de Muros arrinca o seu programa de Nadal. Un contacontos na Axencia de lectura de Esteiro ás 18:00h abre un mes de actividades para todas as idades nas que os principais protagonistas serán os nenos e nenas. Un programa perfectamente compatible co Muros Consciente.

“Unha programación ampla e variada, na que traballaron varias concellerías e que levará o Nadal a todas as parroquias de Muros”, asegura a alcaldesa, María Lago, que agradece “o agarimo e a colaboración da comunidade educativa e do tecido asociativo local”.

Esteiro e Louro acollerán dous obradoiros para público infantil e familiar antes do acto de acendido de Nadal, que será o xoves 5 de decembro ás 19:00 horas no Curro da Praza, despois da actuación de Cayetano Lledó e antes dunha visita guiada polo casco histórico.

As grandes citas do Nadal serán a visita de Papa Noel a Muros o 23 de decembro e a tradicional Cabalgata de Reis o 5 de xaneiro.

O programa inclúe obradoiros e sesións de contacontos en todas as parroquias, un concerto de Nadal da Escola Municipal para os usuarios do Centro de Día, un mercadiño solidario o venres 13 coa colaboración dos centros educativos, teatro ou a Gala de Premios Barbantia de Cultura 2024.

O sábado 21 será a Gala do Deporte, o domingo 22 o Festival Benéfico de Adisbismur, o venres 27 a Festa de Nadal no pavillón de Miraflores e o sábado 28 a San Silvestre de Muros. O 3 de xaneiro, Festa de Reis no pavillón Xosé Lago de Esteiro.

Aquí podes ver o completo programa de Nadal.

Máis novas