Con marea baixa pódense aprezar varias das partes do barco afundido diante da praia da Arnela, no centro de Corme, do que xa nos ten debullado Suso Lista a súa importancia no artigo “Tesouros afundidos de Corme.

Un pecio que ten “unha grande importancia tanto para a historia da navegación en xeral como para a de Corme en particular”, pero que sofre un grave deterioro, segundo valoran as entidades sociais e culturais da vila como Asociación Cultural Insua de Viastela, ademais da Asociación de Veciños Eduardo Pondal, a Asociación Deportiva Vidú, o Corme C.F., a Asociación de Redeiras Illa da Estrela, a Asociación Cultural San Adrián de Corme-Aldea, a Confraría de Pescadores de Corme e a Anpa As Forcadas.

Explican que “ao canalizarse o río da Arnela e cerrarse o ciclo da auga na praia, a area que antes baixaba coas riadas de inverno e aguantaban os restos tapados e protexidos dos embates do mar, deixou de facelo e cada ano o pecio queda máis descuberto e sen protección nas vagas de mar polo que, en breve, asistiremos á súa desaparición se alguén non lle busca un rápido remedio”.

Por iso, ademais de ter solicitado a creación dun “Parque Arqueolóxico e da Biodiversidade Submarino”, solicitan “aos responsables de velar polo noso patrimonio que, urxentemente, se tomen medidas e decisións (hainas) co obxectivo de que o pecio non desapareza e recolleremos firmas para apoiar esta iniciativa”.

Novas relacionadas

• Suso Lista: Tesouros somerxidos na Arnela de Corme.