Mentres deberían estar en marcha as obras de acodicionamentodo chiringuito para poder licitalo de novo de cara ao vindeiro verán (tras pasar un verán pechado por disputas políticas) a Deputación da Coruña e o Colexio Oficial de Arquitectos de Galicia (COAG) vén de asinar un convenio de colaboración para a convocatoria dun concurso de proxectos de arquitectura destinado a promover unha intervención singular na praia de Balarés, en Ponteceso (en paralelo a outra no Pazo de Arenaza, en Oleiros).

O convenio permitirá convocar un concurso para a construción dun auditorio ao aire libre e a mellora da contorna da cafetería da praia de Balarés. A iniciativa pretende integrar a arquitectura coa paisaxe natural, creando un novo espazo cultural e social para concertos e actividades ao aire libre que dinamice o turismo e a vida comunitaria da comarca de Bergantiños.

Os concursos repartirán premios económicos que suman máis de 20.000 euros e suporán a contratación dos equipos gañadores para a redacción dos proxectos de execución e, no seu caso, a dirección de obra. O orzamento de execución material previsto ascende a 150.000 euros para o auditorio de Balarés.

Máis novas