Máis de 300 persoas denunciaron a indiferenza da Xunta ante a necesaria reforma integral do CEIP Barrié de la Maza
Xa tiveran que suspender a súa concentración hai 15 días polo temporal, e de novo unha borrasca ameazaba. Pero a ANPA Xallas mantívose firme na convocatoria de concentración realizada para a tarde deste venres 23 de febreiro, e a comunidade escolar respondeu.
Máis de 300 persoas saíron á rúa ás 16:30h para esixir que a Xunte afronte canto antes unha reforma integral no seu CEIP Barrié de la Maza, pois se atopa nun estado lamentable.
A ANPA aproveitou a copla feita pola comparsa Os de Sempre, gañadores do certame de entroido, para facer este vídeo da manifestación:
O Centro cumpre este ano 50 anos, ata agora e non se realizaron grandes obras desde a súa construción, e o edificio presenta múltiples defectos. “Neste febreiro cumpriuse un ano da caída do teito nunha aula. Temos moito medo de que a cousa vaia a empeorar e de que lles suceda algo grave aos nosos fillos e fillas ou aos traballadores do centro. A Xunta non fai caso do colexio. solicitudes, por iso decidimos manifestarnos”, sinalan dende a ANPA.
Son moitos os espazos e mobiliario do edificio que precisan dunha reforma urxente para adaptalo aos tempos actuais. A directiva do centro solicitou nos últimos 4 anos unha reforma integral que actúe non só na cuberta, senón tamén nas fiestras, carpinterías, calefacción, iluminación, electricidade, illamentos, fachadas, pintura interior, biblioteca, ximnasio, baños, patio. , ademais dunha pasarela de entrada e circulación.
Teñen presentado numerosas solicitudes á Consellería, teñen mantido reunións coa Xefatura Territorial de Educación, mesmo o asunto chegou ao Parlamento de Galicia. Pero apenas se ten conseguido que realizasen unhas pequenas actuacións nas zonas máis afectadas, pero insuficientes para solucionar o problema da cuberta do colexio: unha cuberta plana, con canalóns de auga no interior do edificio, nunha das cidades que chove máis en Galicia. Parches, ao seu entender.
“A ANPA colgou vídeos nas súas redes sociais explicando as peticións ás familias. Introducimos imaxes que demostran que a situación é crítica e que xa non se pode aprazar. Reclamamos a reforma integral do Barrié. Queremos unha escola con instalacións seguras, hixiénicas e actualizadas coa normativa. Non pedimos nada que non sexa o noso dereito”.
Agora, despois da resposta das familias á chamada, dende a ANPA, agradecen o compromiso de toda a comunidade escolar. “Estamos orgullosos de que moitas familias puidesen asistir á manifestación aínda co mal tempo. Cremos que a reforma integral que tanto necesitamos está ao noso alcance. Que a Xunta de Galicia non pode quedar indiferente aos xalleiros que se uniron na chuvia e na sarabia. Hoxe xuntámonos unhas 300 persoas para demostrar que o dereito ao ensino público non pode verse ameazado polas malas condicións do edificio”.
Sinaturas
Ademais da manifestación, a ANPA comezou a recoller sinaturas para presentar ante Xunta e Parlamento a favor da reforma integral. Consideran que a actuación no edificio é imprescindible e moi urxente para solucionar os graves problemas que denuncian. Consideran que no estado actual das instalacións é imposible manter as condicións hixiénico-sanitarias e de seguridade esixidas nun centro educativo.
