Unha delegación de Guinea Bissau visitou onte o concello de Vimianzo, onde foron recibidos polo alcalde, Manuel Antelo O Concello de Vimianzo recibiu onte na casa do concello a unha delegación do goberno de Guinea-Bissau, encabezada polo ministro de Administración territorial, Sola Naquilin. A visita da delegación guineana está coordinada polo Fondo Galego de Cooperación. O luns foron recibidos na Deputación e no concello de Pontevedra e onte - ademais de visitar Vimianzo - reuníronse coa Cámara de Comercio de Santiago e visitaron o Centro de Emprendemento do Gaiás. Hoxe participarán nun seminario organizado pola EGAP e visitarán o concello de Lugo. Na xuntanza, o alcalde, achegounos á realidade socioeconómica e demográfica de Vimianzo, facendo fincapé en accións que resultaron significativas nos ámbitos do emprego e do desenvolvemento. En Vimianzo, despois da recepción oficial, mantiveron unha xuntanza coa asociación galega de Profesionais do Desenvolvemento Local, AFIPRODEL na que analizaron accións que teñen como obxectivo mellorar a cualificación, a cooperación e as sinerxias entre distintos colectivos e a administración.

A xuntanza, coordinada por Rosa Sánchez, a ADL local, foi moi dinámica e participativa. A delegación de Guinea-Bissau expuxo as conclusións da súa visita por Galicia e expresou os puntos de interese para a conversa cos profesionais de desenvolvemento local de Afiprodel. O ministro destacou o seu compromiso e confirmación, refrendado coas visitas realizadas en Galicia, de artellar lexislativamente o marco necesario para un sistema competencial axeitado para empoderar o local e facilitar os necesarios procesos de desenvolvemento de abaixo arriba coa participación da cidadanía.

Tamén participou activamente Dolores Pena, a presidenta de Afiprodel, ofrecedo a experiencia desta entidade de profesionais de desenvolvemento local e comentouse o traballo realizado polos concellos da Costa da Morte e a importancia dos e das técnicas no ámbito do local e do desenvolvemento sostible. Rosa Sánchez e María Jiménez expuxeron o labor realizado nos concellos de Vimianzo e Camariñas nos ámbitos de emprendemento, emprego, desenvolvemento e dinamización dos recursos e potencialidades endóxenas de cada territorio.  As boas prácticas realizadas en emprego e dinamización do tecido asociativo, sector artesanal e proxectos realizados de xeito conxunto entre diferentes concellos da Costa da Morte coa mocidade, o sector comercio, pesca-marisqueo  ou turismo e a importancia da presenza e dinamización do tecido asociativo e empresarial. A intervención de Sofia Agrafojo salientou a labor da Deputación da Coruña na promoción económica e desenvolvemento, as súas liñas estratéxicas e a importancia da colaboración cos concellos e os profesionais destas administracións.

A empresa Cerdeimar de Camariñas ofreceu á delegación unha visión dende o mundo empresarial vinculado aos recursos pesqueiros e marisqueiros no territorio e salientou as potencialidades de Guinea-Bissau neste ámbito e as potencialidades de colaboración. Tamén se falou dos fondos leader e de pesca no territorio e a importancia de artellar estratexias conxuntas como se fai nos GDR e GALP da Costa da Morte.

A delegación invitou aos concellos e Afiprodel a promover programas de intercambio técnicos e económicos entre os territorios que poden ser dende os sectores agrogandeiros, pesca-marisqueo, artesanía, turismo rural e divesificacións económicas baseadas nos potenciais endóxenos dos territorios. A cultura e idioma facilita esta conexión e Guinea-Bissau ten experiencias e oportunidades para compartir e Afiprodel e os concellos da Costa da Morte e de Galicia ten experiencias e capacitación técnica e profesional que son de interese para este país.

Fonte

• Redacción QPC (info@quepasanacosta.com)
• Concello de Vimianzo