Non para por verán o Concello de Vimianzo. Máis ben todo o contrario, se ollamos á completa programación de verán que vén de presentar.

Xa está en marcha o programa do Asalto ao Castelo, que terán cita esta fin de semana cunha charla-coloquio en clave histórica. Ademais a fin de semana seguinte outra dobre cita, primeiro co deporte o venres 26 coa I Legua irmandiña e a continuación coa música co concerto de presentación do Irmandiño Son, no que participan 11 grupos ou artistas locais. O 27 un acto de reivindicación do Castro das Barreiras con diferentes actividades.

Os máis pequenos poderán participar en diferentes actividades xa neste mesmo mes de xuño, podendo inscribirse a partir do día 22 de xuño no obradoiro gastronómico Pezquechef, organizado polo GAC 3, para nenos e nenas de 5 a 12 anos, que terá lugar o 25 de xuño. E para idades comprendidas entre os 3 e os 12 anos haberá obradoiros medievais na Casa da Cultura desde o día 30 de xuño ao 4 de xullo.

Moito deporte

Diferentes disciplinas deportivas poderán practicar os pequenos durante os meses de varán. A piscina permanecerá aberta desde o 1 de xullo e as clases de natación empezarán o 28 de xullo. Antes da natación poderán comezar un curso de tenis, o 7 de xullo, para nenos e nenas a partir de 8 anos; piragüismo empezará o 8 de agosto, para nenos e nenas a partir de 8 anos coa condición de que saiban nadar. Clases de equitación no campo da Areosa, organizadas pola Asociación Cabalar Monte Faro, nas fins de semana a partir do 1 de xullo, nenos e nenas a partir de 8 anos e adultos; e o Soneira SD organiza un Campus de fútbol, para idades comprendidas entre os 6 e os 13 anos, que se realizará entre o 24 e 26 de xullo. O 11 de xullo, este mesmo club de fútbol, organiza un Torneo de fútbol 7 sub 16.

Pequecampamento e Campamento Vimiverán, do 13 ao 17 de xullo para nenos e nenas de entre 3 e 5 anos, e do 20 ao 24 de xullo para as idades comprendidas de 6 a 12 anos. E para os máis maiores, de 12 a 17 anos, Campamento multiaventura en Asturias con descenso do Sella, descesos de canóns e visitas turísticas, do 18 ao 20 de agosto.

Talleres, saídas e teatro

Talleres culturais para a Semana das festas do 3 ao 7 de agosto e xogos tradicionais e inchables o Día do neno, que se fará o 10 de agosto, aproveitando o festivo local. E para rematar agosto unha excursión ao Aquapark, o día 25. Ao igual que estes anos haberá os domingos de xullo e agosto dramatización teatral no Castelo a cargo da compañía teatral Os Quinquilláns, ás 13 e ás 17 horas e os sábados destes dous meses rutas guiadas polo concello. E os artesáns do castelo farán diferentes actividades: obradoiro de modelado de barro do 18 de xullo ao 22 de agosto; exposición a” A innovación na alfarería de Buño” do 15 ao 30 de agosto; o 22 de agosto panillada no patio do castelo e o 29 deste mes desfile con vestimentas de liño. E rematará o verán co Campeonato galego de Atletismo de 10 Km en ruta o 6 de setembro.

Fonte

• Concello de Vimianzo.