Luns. 01.06.2020
El tiempo

Vimianzo volverá escavar o Castro de Barreiras

Vimianzo volverá escavar o Castro de Barreiras
Traballos de escavacion do Castro de Barreiras en 2010 Imaxe dos traballos de escavación do Castro de Barreiras en 2010

O vindeiro 2 de abril comezarán os traballos de escavación do Castro de Barreiras. Recuperado en 2010-2011, o Castro de Barreiras foi foco de atención de toda Galicia durante varios anos. Levaba un tempo relativamente esquecido peroo Concello vimiancés vén de reactivar o seu plan de recuperación do Patrimonio Cultural para levar adiante a súa posta en valor como recurso cultural e turístico.

Esta actuación, financiada na súa integridade con fondos propios e autorizada pola Dirección Xeral de Patrimonio, conta cun orzamento de 14.000€ e vai estar dirixida polo arqueólogo Tito Concheiro, que xa se fixera cargo das sondaxes levadas a cabo no mesmo xacemento fai oito anos.

Esta nova campaña vai consistir na apertura dunha área de 14 x 8 m. situada ao Leste do recinto castrexo, moi próxima á cara interior da monumental muralla. O obxectivo é sacar á luz o conxunto de vivendas de planta circular descuberto nunha das sondaxes feitas no ano 2010.

Difusión

De xeito paralelo aos traballos de escavación e coordinado polas Concellerías de Cultura e Turismo e a dirección técnica do proxecto, levarase a cabo un programa de difusión e divulgación enfocado prioritariamente aos centros de ensino do concello, con visitas activas á escavación, obradoiros e outras actividades relacionadas co coñecemento da Idade do Ferro e a práctica arqueolóxica.

O expediente X

Traballos de escavacion do Castro de Barreiras en 2010 2 Traballos de escavacion do Castro de Barreiras en 2010

O Castro das Barreiras, situado no lugar de Ogas e á beira da estrada a Fisterra, é un xacemento arqueolóxico singular. O chamado expediente X da arqueoloxía galega, ao contrario que a maioría dos castros emprázase nunha chaira, pero as súas defensas son espectaculares e monumentais. As sondaxes feitas anos atrás descubriron os alicerces de varias vivendas de planta redondeada e recuperaron fragmentos de cerámica indíxena e obxectos metálicos. O seu escavador establece a súa cronoloxía na Segunda Idade do Ferro, entre os séculos III e I antes de Cristo, un aspecto que deberá determinar esta nova campaña arqueolóxica.

Novas relacionadas

Fonte

  • Vimianzo.

comentarios