Chegounos á esta redacción o primeiro libro de Jorge Mira, polo cal agradecemos encarecidamente a editorila Auga Editora. O polifacético divulgador científico baiés presentou hai escasamente un mes o libro na súa vila natal. Hoxe queremos afondar sobre o mesmo. Non se trata, nin moito menos, dun libro científico pesado. A frescura da linguaxe e dos temas escollidos fai que sexa un libro para todas as idades. A loita de sexos ou esa diferencia inerente entre o pensar masculino e feminino está moi presente no libro, e podelos ser capítulos como "Vivan as mulleres de cadeiras anchas" ou "Que caran masculinas prefiren as mulleres". O libro tamén afonda en aspectos como o funcionamento do Botafumeiro, de como os cartos compran a felicidade, ou sobre como inflúen a homosexualidade ou o bilingüismo nas nosas vidas. Todo baseado en estudios científicos de todo o mundo aos que Mira lle saca punta dun xeito xenial.

Crónica do libro: A ciencia é aburrida?

No prólogo o catedrático de Medicina Legal e Forense da Universidade de Santiago, Ángel Carracedo, falando da importancia de divulgar a ciencia, asegura que “quen mellor para contar cousas da ciencia que Jorge, que non só é un divulgador nato, un dos mellores que nunca oín, porque vive a ciencia e sabe contala de xeito ameno e aínda por riba con chispa, de forma simple, pero á vez con rigor; senón que ademais conta as cousas como todo o mundo fala”. Jorge Mira recolle neste manual unha interesante serie de aspectos científicos en correcta harmonía coa vida cotiá e faino logo de que, tanto o autor como a editorial, tratasen de dar resposta a unha pregunta básica: a ciencia é aburrida? Mira demostra neste libro que a ciencia, ademais de achegar coñecementos, pode ser unha fonte de entretemento que non pertence ós territorios das idades nin ten fronteiras. Ofrece a posibilidade de descubrir realidades que nos rodean, enfocadas desde o punto de vista científico e achegar respostas a preguntas que milleiros de veces nos fixemos os profanos sen acadar solucións. Neste ano Xacobeo 2010, cantas veces pensamos no mecanismo de funcionamento do botafumeiro? Cantas noticias, películas e fotos saíron nos medios deste incensario único no mundo? Jorge Mira achega respostas e curiosidades científicas sobre un instrumento pensado para afastar os malos cheiros da catedral compostelá no pasado, convertido agora nun símbolo das peregrinacións e de Compostela. Pero tamén hai nas páxinas do libro respostas tan interesantes para actualidade como saber por que o bilingüismo protexe a nosa saúde. Jorge Mira amosa un enxeño narrativo fresco e amable en sesenta e tres propostas, verdadeiras curiosidades da vida, explicadas pola ciencia máis seria e mellor razoada. Un libro cheo de sorpresas e enigmas que poden resultar divertidos por insólitos, como son a posibilidade de saber que temperatura hai, segundo datos tirados da Biblia, no ceo ou no inferno, seguindo os pasos de Galileo Galilei, que xa estudara a estrutura do inferno imaxinado por Dante. En definitiva este libro/manual é un bo instrumento para entreter e aprender. Unha boa proposta válida para todas as idades.

Novas relacionadas

• Presentación do libro A Ciencia no punto de Mira.
• Jorge Mira e a Fundación Eduardo Pondal, premiados polo Padroado Fogar de Bergantiños.
• Jorge Mira achega a Hawking ata á fin do mundo.
• Jorge Mira fai do pregón da Xunqueira 2008 un xogo de letras.
• Entrevista de Jorge Mira en QPC: Pequenas consultas para Jorge Mira.

Fonte

• Redacción de QPC ( Info@quepasanacosta.gal).