Son varios os Concellos da comarca que levan un tempo retransmitindo os plenos por Youtube ou Facebook. Santa Comba, Ponteceso, Muxía ou Muros son algúns dos exemplos. E podemos dicir tras seguilos durante meses, que máis alá dalgunhas persoas irrespetuosas que se amparan na rede para insultar, a emisión dos plenos é unha gran ferramenta de participación cidadá na vida política municipal. Así o avala o gran seguemento que ten.

Na tesitura de decidir ou non se se empezan a emitir os plenos atópase o Concello de Zas. O PSdG presentaba unha moción, pola vía de urxencia, para que se graven e retransmitan as sesións. Unha posibilidade que dende o BNG e mesmo o BNG non a desbotan, se ben votaron en contra da urxencia da moción.

”Non hai ningunha normativa legal que obrigue a grábalos”, sinala o alcalde Lolo Muíño. “É unha decisión política que compartimos todos”, apunta deixando a porta aberta a que os portavoces se xunten para levalo a cabo conxuntamente.

Para a voceira PSdeG-PSOE de Zas, Sheila Ril, a medida é “imprescindible para achegar a política municipal a veciñanza”.

Durante o pleno a voceira socialista levou tamén á sesión unha pregunta en relación coas Bibliotecas Municipais de Zas e Baio, que se atopan pechadas en pleno inicio do curso escolar. O motivo explicado polo alcalde foi o das vacacións das persoas encargadas.