O Auditorio do Centro Cultural e Xuvenil de Muros  acolle o sábado, 27, ás 18:00 horas, este novo espectáculo de Mamá cabrá ‘Paxaro amigo. Músicas para a Paz’. Incluído na Rede Galega de Teatros e Auditorios. As entradas son a 2,50 € e xa están a venda nas oficinas do centro cultural de Muros.

• Voz e guitarra: Gloria Mosquera
• Baixo: Tomi López
• Teclado e acordeón: Diego Maceiras
• Violín: Harry Prince
• Actor: Luís Iglesias “Luchi”
• Dirección: Pepablo Patiño

“Paxaro amigo. Músicas para a Paz”, é un espectáculo músico-teatral destinado a público infantil e familiar, do coñecido grupo de música Mamá cabrá, que nesta ocasión conta coa colaboración de dúas persoas de recoñecido prestixio no mundo do teatro familiar, Pepablo Patiño, de Ghazafallos, e Luchi, de Viravolta; e que o departamento de cultura do concello de Muros, dirixido pola alcaldesa María-Xosé Alfonso, consideraron moi acaído para conmemorar o Día da Paz cos veciños máis novos do municipio, cos que agardan pasar unha agradable tarde de sábado en familia.

Discordia é unha bruxa que é feliz destruíndo a Paz. De feito, a paz faille proer todo o corpo, dende o cocote ata a punta do pé. Discordia goza facendo que todos os animais, e os humanos, se leven mal. Come olivas como unha tola... Menos mal que ten unha curmá fada … pois xa se sabe que na familia hai de todo. Un día vai acontecer algo que cambiará o seu mundo, e o mundo enteiro, para sempre.

"Que todos nun pispás,

compartan cos demais,

dando amor ao redor,

que en paz se vive ... mellooooooorrrrrr."

O novo espectáculo de Mamá Cabra está inspirado no recente libro publicado polo grupo “A Bruxa Discordia”, unha proposta cargada de mensaxes que inciden en construír un mundo mellor e máis xusto.

Mamá Cabra é o grupo musical pioneiro na creación de espectáculos para a infancia.  O ano pasado celebrou o seu 15 aniversario, unha longa viaxe que deixa 12 discos e centos de cancións para saltar, bailar e reflexionar. Neste seu novo espectáculo  fai un percorrido pola historia do grupo e das súas mellores cancións. Un espectáculo diferente cun formato de “Concerto-Teatro”  no que se amosa unha nova Mamá Cabra disposta a seguir enchendo de ilusión e ritmo os corpos da xente miúda. Gloria acompañada  de moitos artistas apaixonados  medran  ao carón dos máis miúdos,  con cancións que ao longo destes  anos quedaron nas nosas memorias.