Fisterra queda, temporalmente, sen Festa Folk na Fin do Camiño

Leilía na Festa Folk na Fin do Camino en 2009 — Leilía na Festa Folk na Fin do Camiño en 2009

Fisterra queda, temporalmente, sen Festa Folk na Fin do Camiño

12:58 30/07/25

Despois de 22 edicións, a Anchoa queda sen Festa Folk na Fin do Camiño. O segundo festival máis lonxevo da comarca, que forma unha combinación perfecta coa potente Festa da Carballeira, non se organizará este mes de agosto. A familia da Asociación Cultural Anchoa, trala renovación de 2023, non dá feito, e non puido sacar adiante esta festa auténtica, feita sen ánimo de lucro.

Asociacion Anchoa Festa Folk 2023 — A Asociación Anchoa recén renovada en 2023 presentando o cartel da 21ª Festa Folk

E precisamente esa organización tan horizontal, tan civil, tan voluntarista, tan altruísta, fixo imposible a celebración desta edición. “A realidade é que organizar un festival coma este é un traballo enorme, un traballo de todo ano, que non se ve e non está recoñecido”, explica Zaira Trillo. “E este ano, diversos problemas persoais, pois de saúde, familiares, de conciliación… fixeron imposible que puidésemos asumir a parte da burocracia”, explica con total franqueza.

”Dános moita pena, obviamente, pero vaia, que isto só é un parón, pero nada máis”, asegura, xa coa cabeza no 2026. “Se o ano se pode, si que o retomaríamos. Somos a segunda xeración de familias que asumen a organización do festival, e na nosa mentalidade é seguir poder organizándoo. É algo que naceu de nós, e esperamos poder seguir facendo”, explica.

O Festival fisterrán, que xa ten sufrido algún parón como o da pandemia ou o de 2014 polo que teñen pasado figuras como Diosketecrew, Sés, Luar na Lubre, Mercedes Peón, A Banda de Balbina, Leilía, O Sonoro Maxín, Os Cempés, ou os habituais da Requinta da Laxeira, terá que esperar ao ano que vén.