Roberto Figueira Martínez participou na Feira Medieval Mariñeira celebrada recentemente en Malpica Coas Festas do Mar ás portas, o concello de Malpica vén de recibir unha doación moi especial. Trátase dunha escultura da Virxe do Carme realizada en madeira polo artesán rianxeiro Roberto Figueira Martínez; un dos participantes na Feira Medieval Mariñeira de Malpica. Os seus traballos en madeira chamaron a atención dende o primeiro momento do alcalde, Eduardo Parga Veiga, que se interesou tanto pola técnica como polos materiais utilizados e o tipo de obras realizadas polo escultor. Virxe do Carme tallada en madeira Roberto Figueira talla con gubias case todo tipo de madeiras, aínda que ten preferencia polas autóctonas, e deseña e fabrica todo tipo de obxectos, tanto colgantes e complementos decorativos como mobles ou elementos estruturais. A escultura da Virxe do Carme, está realizada en piñeiro roxo. Relevos, esculturas de pequeno e mediano formato, carpintería e ebanistería son as especialidades deste rianxeiro, que ademais realiza demostracións en eventos como a Feira Medieval Mariñeira. Normalmente empeza unha peza en cada feira, e en Malpica puxo mans á obra xa dende o primeiro momento coa talla da Virxe. A súa idea era que o público puidese ver o proceso completo da creación, pero faltoulle un día de traballo para lixala e darlle o acabado final. Será o concello o que se encargue de completar a obra. “Normalmente cando me piden algo procuro facer unha peza acorde á duración da feira, pero neste caso non estaba previsto”, explicou o artesán, que se amosou agradecido pola boa acollida que tivo o seu labor. Fonte

• Redacción QPC (info@quepasanacosta.com)
• Concello de Malpica